भंडारपुरी धाम म आयोजित गुरु दर्शन मेला म मुख्य अतिथि के रुप म सामिल होइन मुख्यमंत्री

संत समागम स्थल म भव्य मंच निर्माण अऊ मैदान के समतलीकरण अऊ गांव म सतनाम भवन के घोषणा
गुरुदर्शन मेला बर प्रति साल देहे जाही 10 लाख रुपिया
भंडारपुरी के अधूरा गुरुद्वारा ल पूरा करे अऊ भंडारपुरी ले गैतरा तक सड़क निर्माण के घोषणा
रायपुर, मुख्यमंत्री श्री भूपेश बघेल आज रायपुर जिला के आरंग तहसील अंतर्गत भंडारपुरी धाम म आयोजित गुरु दर्शन मेला म मुख्य अतिथि के रूप म सामिल होइन। उमन सबले पहिली गुरु गद्दी दर्शन करके प्रदेश के जनता के खुशहाली बर आशीर्वाद लीन।
मुख्यमंत्री श्री भूपेश बघेल ह संत शिरोमणि परम पूज्य बाबा गुरु घासीदास के जयकारा के संग मेला म आयोजित कार्यक्रम ल बरसत पानी म संबोधित करत कहिन कि आज एकादशी के दिन ही गुरु बालकदास जी के राज्याभिषेक होए रहिस। बाबा गुरुघासी दास के पुत्र गुरु बालकदास के गद्दीनसीन होए के याद म बरसों ले संत समागम अऊ गुरुदर्शन के परंपरा ल पूरा करे जात हे।
मुख्यमंत्री ह कहिन के हमर प्रदेश धान के कटोरा अऊ किसान मन के प्रदेश ये। किसान ठंड, गर्मी अऊ बरसात के चिंता करे बिना कड़ा मेहनत करथे। हमर सरकार किसान मन ल उंखर मेहनत के प्रतिफल देहे बर प्रतिबद्ध हे। उमन कहिन के हमर सरकार राजीव गांधी किसान न्याय योजना, गोधन न्याय योजना अऊ भूमिहीन कृषि मजदूर न्याय योजना के किश्त 17 अकटूबर ल देवइया हे।
उमन कहिन कि गुरु घासीदास बाबा के संदेश मनखे-मनखे एक समान ल आगू बढ़ात सामाजिक समरसता ल अऊ मजबूत करे जाही। सरकार किसान मन, मजदूर मन के संग सबो वर्ग के आर्थिक मजबूती बर सरलग काम करत हे। राज्य के किसान मन ल धान के जतका मूल्य देहे जात हे, वोतका देश के कोनो राज्य म नइ मिलत हे। बाबा घासीदास ह गौवध ल रोके के जेन काम करे हें, वोला भुलाए नइ जा सकय। ये बेरा म उमन संत समागम स्थल म भव्य मंच निर्माण अऊ मैदान के समतलीकरण, गांव म सतनाम भवन, गुरुदर्शन मेला बर प्रति साल 10 लाख रुपिया, भंडारपुरी के अधूरा गुरुद्वारा ल पूरा करे अऊ भंडारपुरी ले गैतरा तक सड़क निर्माण के घोषणा करिन। ये बेरा म सतनामी समाज के संत, राजमहंत, प्रबुद्ध जन, पंचायत अउर नगरीय निकाय के जनप्रतिनिधि गण संग बड़ संख्या म मनखे उपस्थित रहिन।