कोरबा जिला म मोबाईल बनिस गुरूजी, लइका मन घर बइठे उत्साह के संग लेवत हे पढ़ाई के मजा

आनलाइन पोर्टल ‘‘पढ़ई तुंहर दुआर‘‘ के माध्यम ले जिला के 81 हजार ले जादा छात्र मन के होवत हे घर बइठे पढ़ई

कोरबा, 1 मई 2020। देस म लॉकडाउन के सेती छत्तीसगढ़ के हर जिला के स्कूल बंद हे। ये लाक डाउन के स्थिति म घलोक कक्षा 9 वीं म पढ़इया विद्यार्थी आंचल, ओम प्रकास, आयुष, पारस, नूतन, पवन, नीतू अऊ आन कक्षा मन म पढ़इया हजारों लइका मन बर मोबाईल गुरूजी के काम करत हे। कक्षा पहली ले लेके बारहवीं तक के लइका खेल-खेल म मोबाईल के माध्यम ले अपन पढ़ई पूरा करत हे। लाक डाउन के बेरा म लइका मन के पढ़ई प्रभावित झन होवय, ए खातिर राज्य शासन के स्कूल शिक्षा विभाग ह ‘‘पढ़ई तुंहर दुआर‘‘ नाम के ऑनलाईन पोर्टल तियार करे हे। ये ऑनलाईन पोर्टल के माध्यम ले शिक्षक अऊ छात्र अपन अपन घरे ले वीडियो कान्फ्रेंसिंग के माध्यम ले जुडत हें। ये पोर्टल म घर बइठेच अपन मोबाईल या कंप्यूटर के माध्यम ले लाग ईन करके आनलाइन शिक्षा के लाभ लेहे जात हे। पढ़ई तुंहर दुआर छत्तीसगढ़ के पहिली बड़का आनलाइन शिक्षा प्लेटफार्म हे जऊन आन हिन्दी भाषी राज्य मन के छात्र मन बर घलोक लाभदायक हे। कोरबा जिला के लइका मन म ऑनलाईन पढ़ाई ल लेके अड़बड़ उत्सुकत हें। जिला के ग्रामीण क्षेत्र के लइका घलोक पढ़े म रूचि देखाव हें। पढ़ई तुंहर दुआर ऑनलाईन पोर्टल ले जिला के सात हजार 477 शासकीय अउ निजी स्कूलों के शिक्षक के संग इक्यासी हजार 471 विद्यार्थी घलोक जुड़ गये हें अऊ छात्र अऊ शिक्षक मन के समूह ले बने दू हजार 099 वर्चुअल क्लास बनइया हें।