मुख्यमंत्री श्री भूपेश बघेल ह बाबा गुरु घासीदास जयंती के अवसर म करिन चार बड़का घोषणा

रायपुर, 18 दिसंबर 2020। मुख्यमंत्री श्री भूपेश बघेल ह आज बाबा गुरू घासीदास जयंती के अवसर म चार बड़का घोषणा करिन। भिलाई के सेक्टर 6 म गुरु घासीदास सेवा समिति कोति ले आयोजित कार्यक्रम ल संबोधित करत मुख्यमंत्री ह नवा रायपुर म गुरु घासीदास जी के नाम म शोध पीठ अऊ संग्रहालय स्थापित करे के घोषणा के संगेच निगम क्षेत्र मन म डायग्नोस्टिक सेंटर सुरू करे के घोषणा घलोक करिन जेकर नाम मिनी माता के नाम म होही। मुख्यमंत्री ह पंथी नृत्य के महान कलाकार स्वर्गीय श्री देवदास बंजारे के सुरता म राज्य स्थापना दिवस समारोह म पंथी नृत्य पुरस्कार सुरू करे के घोषणा घलोक करिन, संगेच उमन राजधानी म अनुसूचित जाति वर्ग के छात्र-छात्रा मन ल प्रतियोगी परीक्षा म सुविधा देहे बर रहवासी हॉस्टल 200 सीटर क्षमता के निर्माण के घोषणा घलोक करिन।
मुख्यमंत्री श्री बघेल ह ये बेरा म कहिन के गुरु घासीदास बाबा के महान संदेश मनखे मनखे एक समान हे। ये समानता के सिद्धांत हमार संविधान के घलोक अहम हिस्सा हे। बाबा जी ह आज ले ढाई सौ साल पहिली अहिंसा अऊ सत्य के संदेश दीन जऊन उद्देश्यपूर्ण जीवन के असली स्रोत हे। महात्मा गांधी ह अहिंसा अऊ सत्य के सिद्धांत उपर चलके देश ल आजादी देवाइन। बाबा साहब अंबेडकर ह जब हमार संविधान के निर्माण करिन जे संविधान म समानता के उंकर असली भावना सामिल करिन। मुख्यमंत्री ह कहिन के छत्तीसगढ़ बाबा गुरु घासीदास जी के देखाय आदर्श म चलत हे। हमर छत्तीसगढ़ के समाज समतामूलक समाज हे। हम सब इहां प्रेम अऊ सद्भाव ले रहिथन। बाबा गुरु घासीदास ह हमला प्रेम, अहिंसा, सत्य अऊ करुणा के संदेश देहे हे इही संदेश उपर चलके छत्तीसगढ़ सरलग तरक्की अऊ विकास के रद्दा म आगू बढ़त हे।
ये मौके म नगरीय प्रशासन मंत्री डॉ. शिवकुमार डहरिया ह कहिन के छत्तीसगढ़ बाबा गुरु घासीदास अऊ बाबा साहब अंबेडकर के देखाय आदर्श म चलत हे। बाबा जी ह जऊन मनखे मनखे एक समान के सिद्धांत देहे रहिन, वो हमर आदर्श सिद्धांत हे हम इही सिद्धांत उपर चलत छत्तीसगढ़ ल आगू ले जाय बर प्रतिबद्ध हन। ये मौका म भिलाई के विधायक अऊ महापौर श्री देवेंद्र यादव, छत्तीसगढ़ राज्य अनुसूचित जाति विकास प्राधिकरण के अध्यक्ष श्री भुनेश्वर बघेल संग आन जनप्रतिनिधिगण उपस्थित रहिन।