बिलासपुर, 27 मई 2024। शहर के गुरू घासीदास सेंट्रल यूनिवर्सिटी के असिस्टेंट प्रोफेसर के सून्ना मकान के ताला तोड़के चोर मन ह धावा बोले हें। चोरहा मन ह आलमारी म रखे सोना-चांदी के गहना समेत करीब पांच लाख के माल पार कर देहे हें। शिकायत म पुलिस केस दर्ज करके मामला के जांच करत हे। घटना कोनी थाना क्षेत्र के बताए जात हे। सेंदरी के अरपा ग्रीन कॉलोनी निवासी सूर्यभान सिंह गुरू घासीदास सेंट्रल यूनिवर्सिटी म असिस्टेंट प्रोफेसर के पद म काम करथे। बीते 24 मई के संझा करीब पांच बजे वो ह अपन परिवार संग अपन बहिनी ले मिले बर उत्तर प्रदेश के सोनभद्र गीस। ए बेरा म मकान सून्ना रहिस अऊ ताला बंद रहिस।
इतवार के भिनसरहा वोखर परोसी यशवंत पटेल ह ओ मन ल फोन करके बताइस कि ऊंखर घर के दरवाजा खुला हे अऊ ताला टूटे हे। खबर मिलतेच वो ह संझा ल अपन घर पहुंचिस। तलाशी लेहे म पता चलिस के भितरी कुरिया मन म सामान बगरे परे हे अऊ आलमारी के तारा घलोक टूटे हे। आलमारी के भीतरी के बेग म रखे एक तोला वजनी सोना के चूड़ी, डेढ तोला वजनी सोना के हार, ढाई तोला वजनी सोना के चेन, सात अंगूठी, झुमका, कान के टाप्स, मंगलसूत्र, कान के बाली, नथनी, मांग टीका, सोना के पायल, चांदी के चार पायल, चांदी के मछली, सिक्का, चांदी के हार संग आन सामान गायब हे। एखर सूचना उमन कोनी पुलिस ल देहे हें।