बालोद, लोक स्वास्थ्य यांत्रिकी अऊ ग्रामोद्योग मंत्री अऊ सतनामी समाज के जगतगुरु गुरू रूद्रकुमार आज बालोद जिला म आयोजित सतनाम संदेश यात्रा म सामिल होइन। ये बेरा म उमन ह कहिन कि सतनाम समाज के सबो अनुयायी मन ल परम पूज्य बाबा गुरू घासीदास के विचार अऊ सिद्धांत मन ल आत्मसात् करके अपन विचार अऊ कर्म ल स्वच्छ, सुंदर अऊ उज्ज्वल बनाना चाही। उमन सतनाम पंथ के प्रवर्तक परम पूज्य बाबा गुरू घासीदास अऊ आन गुरू मन के त्याग, तपस्या अऊ ऊंखर पावन कर्म अऊ गौरवशाली विरासत के संबंध म विस्तार ले जानकारी दीन।
मंत्री गुरू रूद्रकुमार आज जिला मुख्यालय बालोद के तीर पाकुरभाट गांव म सतनामी समाज कोति ले आयोजित समारोह ल संबोधित करत रहिन। मंत्री गुरू रूद्रकुमार के गुरूदर्शन, रावटी अऊ सतनाम संदेश शोभायात्रा के अवसर म बालोद जिला म सतनामी समाज के मनखे मन ह जगा-जगा म आत्मीय अऊ भव्य स्वागत करिन। ये बेरा म ओटेबंद चौक, अर्जुन्दा चौक गुण्डरदेही, ग्राम सिकोसा, ग्राम पड़कीभाट अऊ जिला मुख्यालय बालोद म सतनामी समाज के मनखे बड़ संख्या म उपस्थित होके सतनामी समाज के जगतगुरु गुरू रूद्र कुमार के स्वागत अभिनंदन करिन। ये बेरा म मंत्री गुरू रूद्रकुमार ह ग्राम सिकोसा म पहिली महिला सांसद स्व. मिनीमाता के प्रतिमा के अनावरण घलोक करिन।
