गृहमंत्री श्री ताम्रध्वज साहू ह करिस गुरूर म नवा थाना भवन के लोकार्पण

देऊर मंदिर ल विकसित करे बर दस लाख रूपिया के घोषणा
नवा थाना परिसर म लगाए गीस बिही के पेड़

बालोद, प्रदेश के गृह, जेल, लोक निर्माण, धार्मिक न्यास अऊ धर्मस्व मंत्री श्री ताम्रध्वज साहू आज तहसील मुख्यालय गुरूर म 40 लाख रूपिया लागत ले बने नवा थाना भवन के लोकार्पण करके अपन बधाई अऊ शुभकामना दीन। उमन नवा थाना भवन परिसर म बिही के पेंड लगाइन अऊ मनखे मन ल वृक्षारोपण अऊ ओखर सुरक्षा बर प्रेरित करिन। कार्यक्रम म महिला एंव बाल विकास अऊ समाज कल्याण मंत्री श्रीमती अनिला भेंडिया, विधायक श्रीमती संगीता सिन्हा, कलेक्टर श्रीमती रानू साहू, पुलिस अधीक्षक श्री एम.एल.कोटवानी मौजूद रहिन। गृह मंत्री श्री साहू ह ये बेरा म कार्यक्रम ल सम्बोधित करत कहिन कि अपराध नियंत्रण बर जनजागरूकता जरूरी हे। उमन पालक मन ल घलोक लइका मन ल अच्छा शिक्षा देहे अऊ सही अउ गलत के प्रति जागरूक करे के अपील करिन। मंत्री श्री साहू ह कहिन कि मुख्यमंत्री श्री भूपेश बघेल के नेतृत्व म समाज के सबो वर्ग के बेहतरी बर सरलग काम करे जात हे। उमन कहिन कि अल्पकालीन कृषि ऋण माफी, पच्चीस सौ रूपिया प्रति क्विंटल धान खरीदी, छोटे भू-खण्ड के खरीदी बिक्री म छुट, बिजली बिल हाफ आदि ले मनखे मन ल राहत मिले हे।