अब अस्पताल खुद पहुंचत हे मनखे मन के बीच, हाट-बाजार क्लिनिक योजना बर कांकेर ल मिले 8 नवा एम्बुलेंस ले एक हफ्ता म ही करीब 400 मनखे मन के इलाज

रायपुर,. 4 फरवरी 2021। छत्तीसगढ़ शासन मनखे मन ल निःशुल्क स्वास्थ्य सेवा सुलभ कराए बर सरलग नवा जतन करत हे। मुख्यमंत्री हाट-बाजार क्लिनिक योजना के माध्यम ले अस्पताल अब खुद मनखे मन के बीच पहुंचत हे। ये योजना के माध्यम ले प्रदेश के दूरस्थ गांव मन अऊ वनांचल मन के हाट-बाजार मन म मनखे मन के निःशुल्क जांच अऊ उपचार करके दवई उपलब्ध कराए जात हे। मुख्यमंत्री श्री भूपेश बघेल ह हाले म 28 जनवरी के अपन कांकेर प्रवास के समय मुख्यमंत्री हाट-बाजार क्लिनिक योजना बर आठ नवा एम्बुलेंस ल हरी झंडी देखाए रहिन। कांकेर जिला के हाट-बाजार मन म मनखे मन ल स्वास्थ्य सुविधा मुहैया कराए कोयलीबेड़ा विकासखण्ड म दू इकतहा अऊ विकासखण्ड म एक-एक नवा एम्बुलेंस भेजे गए रहिस।
स्वास्थ्य मंत्री श्री टी.एस. सिंहदेव के पहल म मुख्यमंत्री हाट-बाजार क्लिनिक योजना म जादा ले जादा मनखे मन तक स्वास्थ्य सेवा पहुंचाए बर एक करोड़ 54 लाख रूपिया के लागत ले कांकेर जिला बर आठ नवा एम्बुलेंस बिसाए गए हे। स्वास्थ्य विभाग के मोबाइल मेडिकल टीम ह ए एम्बुलेंस मन के सहायता ले 28 जनवरी ले 3 फरवरी के बीच साते दिन म 18 हाट-बाजार मन म 382 मनखे मन के इलाज करे गए हे। स्वास्थ्य विभाग कोति ले ये समें म चारामा, दुर्गकोंदूल अऊ कोयलीबेड़ा विकासखंड के चार-चार, नरहरपुर अऊ कांकेर के दू-दू अऊ अंतागढ़ अऊ भानुप्रतापपुर के एक-एक हाट-बाजार म चिकित्सा सुविधा उपलब्ध कराए गए हे।
मोबाइल मेडिकल टीम ह ए नवा एम्बुलेंस मन के उपयोग करके पाछू एक हफ्ता म दुर्गकोंदूल विकासखंड म 130, कोयलीबेड़ा म 53 अंतागढ़ म 48, कांकेर म 45, भानुप्रतापपुर म 42, चारामा म 35 अऊ नरहरपुर म 29 मनखे मन के उपचार करके दवई प्रदान करे हे। ये दौरान कोयलीबेड़ा विकासखंड के सुलांगी, छोटेबेटिया, ऐसेबेड़ा अऊ मायापुर (पीव्ही-18), चारामा के मैनपुर, गांडागौरी, भिलाई अऊ टिकरापारा, दुर्गकोंदूल के झिटकाटोला, तरईघोटिया, हाटकोंदल अऊ कराकी, नरहरपुर के मांडाभर्री अऊ बादल, कांकेर के माकड़ीखुना व देवरी अऊ अंतागढ़ के किसेकोड़ो अऊ भानुप्रतापपुर के तरांदुल हाट-बाजार म स्थानीय मनखे मन के निःशुल्क जांच अऊ उपचार करके दवई देहे गए हे।