हाट-बजार मन म कला जत्था नाट्य अऊ नृत्य शैली म करत हें योजना मन के प्रचार
रायपुर, राज्य सरकार ह अपन जनकल्याणकारी योजना मन ल आदिवासी अऊ वनवासी मन तक पहुंचाए बर उंकरे बोली म सहज अऊ सरल ढंग ले पहुंचाए के अजब पहल करे हे। ए बात बर कला जत्था दल ह हाट-बजार मन म जाके राज्य शासन के प्राथमिकता वाले मुख्यमंत्री सुपोषण अभियान, मुख्यमंत्री हाट-बाजार क्लीनिक योजना, नरवा, गरूवा, घुरूवा अऊ बाड़ी योजना ल स्थानीय बोली म मनखे मन ल नाट्य अऊ नृत्य शैली म सहज ढंग ले बतावत हें।
राज्य सरकार के जनसम्पर्क विभाग कोति ले परयोग के तौर म दू महीना पहिली बस्तर अऊ दंतेवाड़ा जिला के करीबन 90 गांव मन म स्थानीय कला जत्था मन के माध्यम ले हल्बी अऊ गोंड़ी म राज्य शासन के जनकल्याणकारी योजना मन के प्रचार-प्रसार करे गए रहिस, जेखर सकारात्मक परिणाम मिले के बाद अब बस्तर संभाग के सबो सातों जिला मन म स्थानीय कलाजत्था मन के माध्यम ले स्थानीय बोली हल्बी, गोण्डी अऊ भतरी म सरकार के योजना मन के प्रचार-प्रसार करे जात हे। कला जत्था मन कोति ले योजना मन के प्रचार-प्रसार म स्थानीय मनखे मन ल जोड़े बर स्थानीय संस्कृति, परम्परा, नृत्य अऊ नाट्य शैली म कार्यक्रम तियार करे गए हे। स्थानीय संस्कृति, नाट्य, प्रहसन के बीच म जनकल्याणकारी योजना मन के जानकारी रोचक ढंग ले मनखे मन ल दिए जात हे। एखर अन्तर्गत बस्तर संभाग के छै जिला मन बस्तर, दंतेवाड़ा, बीजापुर, सुकमा, कोण्डागांव अऊ नारायणपुर जिला के हाट-बजार मन म कला जत्था मन कोति ले हल्बी अऊ गोंण्डी म अऊ कांकेर जिला म छत्तीसगढ़ी म योजना मन के प्रचार-प्रसार करे जात हे।
