51 हितग्राही मन ला नोटिस, सितंबर ले पहिली मकान पूरा करे के देहे गीस निरदेस
दंतेवाड़ा, प्रधानमंत्री आवास योजना (1.0) के तहत दंतेवाड़ा जिला के नगर पंचायत बारसूर ह कइ बछर ले आधा-अधूरा पड़े मकान मन ला पूरा करवाए बर अभियान सुरू करे हे। नगर पंचायत ह अइसन 51 हितग्राही मन के पहिचान करे गे हे, जेकर मकान मन के निरमान तय समे के बाद घलो पूरा नई हो पाए हे।
घर-घर जाके करे जात हे जांच
नगर पंचायत के टीम जम्मो आधा-अधूरा मकान मन के मौका मं जाके जांच करत हे। जांच के बाद संबंधित हितग्राही मन ला नोटिस जारी करे गेहे अउ ओमन ला सितंबर 2026 ले पहिली काम पूरा करे के निरदेस देहे गेहे।
किस्त मिले के बाद घलो अधूरा हे कतको मकान
नगर पंचायत के मुताबिक, कतको हितग्राही मन ला योजना के अलग-अलग किस्त के पइसा मिल चुके हे, तभो ले ओमन काम ला तय स्तर मं पूरा नई करे हें। जेन हितग्राही मन ला पाया के पइसा मिले रहीस, ओमन ला लिंटल तक बनाना रहीस। छत के पइसा पवइया मन ला छत तक अउ छत के बाद के पइसा पवइया मन ला फिनिशिंग तक के काम पूरा करना रहिस। एकर बाद घलो कतको मकान अभी तक अधूरा पड़े हे।
समे पूरा होए के बाद नियम के मुताबिक होही कारवाही
मुख्य नगरपालिका अधिकारी ह बताइन के प्रधानमंत्री आवास योजना (1.0) के जम्मो अधूरा मकान मन के सरलग जाच करे जात हे। नगर पंचायत के टीम ह हितग्राही मन ले मिलके ओमन ला जल्दी मकान पूरा करे बर कहत हें। ओमन कहिन के तय समे मं काम पूरा नई करइया मन के खिलाफ नियम के मुताबिक जरूरी कारवाही करे जाही।
योजना के उदेस – हर परिवार ला पक्का मकान
प्रधानमंत्री आवास योजना के उदेस जम्मो हकदार परिवार मन ला सुरछित अउ पक्का मकान देना हे। नगर पंचायत बारसूर डाहर ले चलाए जात ए अभियान अधूरा मकान मन ला जल्दी पूरा करवाके गरीब मन ला ओकर पूरा लाभ देवाए बर एक बड़का कदम हे।