रायपुर, हमर तिरंगा पुरखा मन के कई बछर के संघर्ष अऊ बलिदान के जीवंत चिन्हारी ये। हम सबो तिरंगा के शान ल हमेशा बनाए रखबो, अपन अमर बलिदानी मन ल कभू नइ भूलावन अऊ सबो मिलके विकसित, समृद्ध अऊ सशक्त छत्तीसगढ़ के निर्माण करही। मुख्यमंत्री श्री विष्णु देव साय आज राजधानी रायपुर के मरीन ड्राइव म आयोजित स्वतंत्रता दौड़ म सामिल होइन अऊ कार्यक्रम ल संबोधित करिन। ए बेराम उमन हजारों युवा मन के संग स्वतंत्रता दौड़ लगाइन अऊ भारत माता अऊ अमर बलिदानी रानी दुर्गावती के प्रतिमा उपर माल्यार्पण करके ओ मन ल नमन करिन।
मुख्यमंत्री श्री साय ह कहिन के तिरंगा म करोड़ों भारतीय मन के आकांक्षा समाए हे अऊ ये हमर वीरता, शांति अऊ समृद्धि के भाव के अमिट चेतना ये।
श्री साय ह पवित्र तिरंगा ल प्रणाम करत कहिन के हमार देश के यशस्वी प्रधानमंत्री श्री नरेंद्र मोदी के आह्वान म पाछू कुछ बछर ले स्वतंत्रता दिवस म पूरा देश तिरंगामय हो जाथे। उमन कहिन के पाछू कुछ दिन ले हम सबो अलग-अलग तरीका ले ए पावन दिवस ल उत्साह के संग मनावत हन। तिरंगा यात्रा अऊ हर-घर तिरंगा फहराए के संकल्प ह ए पावन अवसर ल जन-जन ले जोड़ देहे हे। मुख्यमंत्री ह कहिन के ये तिरंगा यात्रा केवल एक आयोजन भर नो हे, बल्कि हमर एकता, अखंडता अऊ राष्ट्रीय गौरव के जीवंत चिन्हारी ये। उमन कहिन के स्वतंत्रता दिवस हमला ये सुरता कराथे के आज़ादी अनगिनत बलिदान के अमूल्य देन ये। लाखों-करोड़ों देशभक्त मन ह अपन प्राण न्योछावर करिन, तब जाके हमला ये स्वतंत्रता प्राप्त होए हे।
ए बेरा म विधायक श्री पुरंदर मिश्रा, विधायक श्री मोतीलाल साहू, विधायक बिर खुशवंत साहेब, विधायक श्री अनुज शर्मा, जिला पंचायत अध्यक्ष श्री नवीन अग्रवाल, खेल अऊ युवा कल्याण विभाग के सचिव श्री यशवंत कुमार मौजूद रहिन।
हमर तिरंगा पुरखा मन के कई बछर के संघर्ष अऊ बलिदान के जीवंत चिन्हारी ये : मुख्यमंत्री श्री साय
