दिव्यांग महिला मेट ह पेश करिस सेवा के गजब मिसाल

दुर्ग, हिम्मत, हौसला अऊ जुनून के बल-बूता म एक दिव्यांग महिला समाज बर वो एक आदर्श बनके उभरे हे। महात्मा गांधी राष्ट्रीय ग्रामीण रोजगार गारंटी योजना म मेट के काम करइया दुर्ग जिला के ग्राम चीचा के सुश्री अनुराग ठाकुर ह गांव वाले मन ल रोजगार देवाए म महत्वपूर्ण भूमिका निभावत हे।
दुर्ग जिला के पाटन विकासखण्ड के ग्राम पंचायत-चीचा के 34 वर्षीय सुश्री अनुराग ठाकुर एक पांव ले दिव्यांग हे। वोखर परिवार म दू बहिनी अऊ एक भाई हे। बचपन म ही नियति ह ओखर मूड़ी ले पिता के साया उठा ले रहिस। अइसन म परिवार म बड़े होए के सेती ओखर खांधा म समय ले पहिलीच परिवार के जिम्मेदारी आ गए रहिस। काफी कोशिश के बाद वो ह अपन स्नातक तक के पढ़ाई पूरा करिस। ग्राम पंचायत के पहल म महात्मा गांधी नरेगा अंतर्गत साल 2012 ले ओ ह मेट के रुप म काम करत हे। वो भिनसरहा घर के सबो काम मन ल निपटाके महात्मा गांधी नरेगा के कार्यस्थल म पहुँचथे अऊ मेट के रुप म मनरेगा श्रमिक मन ल काम आबंटित करके, ऊंखर काम मन के हिसाब अपन मेट-माप पंजी म दर्ज करथे। सुश्री अनुराग अपन काम म अतका जादा कुशल हो गए हे कि ओ ह आन मेट के जइसे सबो काम मन ल सहजता ले निपटा लेथे। एकर कौशल के आगू एकर दिव्यांगता कहूं नजर ही नइ आय।
जीवन के उतार-चढ़ाव ल नजदीक ले देखइया सुश्री अनुराग ह परिवार म बड़े होए के भूमिका के घलोक बखूबी निर्वहन करे हे। वो ह विरासत म मिले खेती-बाड़ी ल संभालत अपन छोटे भाई-बहिनी मन ल पढ़ाइस अऊ ओखर बिहाव घलोक कराइस। सुश्री ठाकुर बताथे कि महात्मा गांधी नरेगा ले ओ ल बनेच सहारा मिलीस। योजना म मेट के रुप म मिलइया पारिश्रमिक ले ओ अपन आजीविका पहिली ले बेहतर तरीका ले चला पात हे। मेट के काम ले ओ ल अब तक बतौर पारिश्रमिक एक लाख 67 हजार रूपिया मिले हे।
महिला मेट के रुप म सुश्री अनुराग ह महात्मा गांधी नरेगा म चलइया काम मन म महिला मन के भागीदारी ल बढ़ाए बर घर-घर महिला मन ले संपर्क करके उंखर से काम करे सलाह देथें। उंखर सक्रियता के फलस्वरुप साल 2018-19 म 189 महिला मन ल 4 हजार 346 मानव दिवस के रोजगार मिलीस, जेन साल 2019-20 म बढ़के 225 महिला मन कोति ले सृजित मानव दिवस 7 हजार 719 हो गीस। महिला मन के भागीदारी के ये सिलसिला साल 2020-21 म घलोक जारी रहिस। ये साल 289 महिला मन 16 हजार 271 मानव दिवस के रोजगार प्राप्त करिन। उहें चालू वित्तीय साल 2021-22 म 16 फरवरी के स्थिति म 277 महिला मन ल 5 हजार 430 मानव दिवस के सीधा रोजगार मिले हे।
सुश्री ठाकुर मनरेगा म महिला मन के भागीदारी बढ़ाए के अलावा, गाँव म महिला स्व सहायता समूह के दीदी मन के संग घलोक काम करत हे। वो खुदे ओम सांईनाथ स्व सहायता समूह ले जुड़े हे अऊ समूह म लेखापाल के भूमिका निभाथें। अपन लीडरशीप अऊ लेखा संधारण के कौशल के बलबूते वो ह गाँव म राष्ट्रीय ग्रामीण आजीविका मिशन के अंतर्गत गठित 14 महिला स्व सहायता समूह मन ल आपसी सक्रिय बनाके रखे हे। एखर अलावा वो सरकार के महत्वपूर्ण योजना मन ल सीधा हितग्राही तक पहुँचाए बर गांव के निवासी मन ल जानकारी घलोक प्रदान करथे।