मुख्यमंत्री छत्तीसगढ़ हस्तशिल्प विकास बोर्ड के नवनियुक्त अध्यक्ष श्रीमती शालिनी राजपूत के पदभार ग्रहण समारोह म होइन सामिल
मुख्यमंत्री ह हस्तशिल्पी मन ल औजार उपकरण योजना अंतर्गत अनुदान राशि के करिन वितरण
रायपुर, मुख्यमंत्री श्री विष्णु देव साय आज राजधानी रायपुर स्थित पंडित दीनदयाल उपाध्याय ऑडिटोरियम म आयोजित छत्तीसगढ़ हस्तशिल्प विकास बोर्ड के नवनियुक्त अध्यक्ष श्रीमती शालिनी राजपूत के पदभार ग्रहण समारोह म सामिल होइन। ए बेरा म मुख्यमंत्री ह कहिन के छत्तीसगढ़ म हस्तशिल्प विकास के अपार संभावना हे। इहां के कलाकृति मन के मांग विदेश मन म हे। छत्तीसगढ़ के हस्तशिल्प उत्पाद मन ल बाजार उपलब्ध कराए अऊ हस्तशिल्पि मन ल ऊंखर हुनर के उचित कीमत देवाए बर सरकार प्रतिबद्ध हे। मुख्यमंत्री ह हस्तशिल्पि मनल औजार उपकरण योजना अंतर्गत पाँच पांच हजार रुपिया के अनुदान राशि के वितरण करिन।
मुख्यमंत्री श्री साय ह छत्तीसगढ़ शिल्प विकास बोर्ड के नवनियुक्त अध्यक्ष श्रीमती शालिनी राजपूत ल पदभार ग्रहण करे म बधाई अउ शुभकामना देवत कहिन के ऊंखर अगुवइ म छत्तीसगढ़ ह हस्तशिल्प विकास बोर्ड शिल्पकार मन के बेहतरी बर काम करही। उमन कहिन कि छत्तीसगढ़ के हरेक इलाका म हस्तशिल्पी बहुत अच्छा काम करत हें। सुशासन तिहार के समय मोला कोंडागांव के शिल्पग्राम जाय के मौका मिलीस। उहाँ मैं ह शिल्पकार मन ले मुलाकात करेंव अऊ उंखर कला ल नजदीक ले देखेंव। अइसनहे रायगढ़ के एकताल म घलोक शिल्पकार धातु ले कलाकृति बनाथें। बस्तर म काष्ठशिल्प ले लकड़ी के सुंदर आकृति बनाए जाथे। पूरा प्रदेश म हस्तशिल्पि मन के हुनर अद्भुत हे। आज ए कार्यक्रम म मोला जेन सुंदर टोपी भेंट करे गीस, वो छिंद अऊ कांसा ले बनाए गए हे। जशपुर म हमार गाँव के नजदीक कोटामपानी म घलोक छिंद अऊ कांसा ले बहुत सुंदर-सुंदर कलाकृति बनाए जाथे।
मुख्यमंत्री श्री साय ह कहिन के शिल्पकार मन ल जादा ले जादा प्रशिक्षण देहे के जरूरत हे। ये बहुत महत्वपूर्ण बात हे कि हस्तशिल्प के काम ज्यादातर ग्रामीण इलाका मन म होथे ते पाए के हस्तशिल्प विकास के संग हम बहुत बड़का पैमाना म गांव वाले मन ल रोजगार उपलब्ध करा सकत हन। मोला आशा हे कि हस्तशिल्प विकास बोर्ड ए कोति काम करही अऊ शिल्पकार मन ल प्रशिक्षण के संग लोन-सब्सिडी घलोक जादा ले जादा देवा के रोजगार ले जोड़े जाही।
मुख्यमंत्री ह कहिन के कोंडागांव के डोकरा आर्ट के विदेश मन म माँग हे। ये जरूरी हे के शिल्पकार मन ल बाजार के संग उत्पाद के उचित कीमत मिलय। बिना बिचौलिया मन के हस्तशिल्पी मन के पहुँच सीधा बाजार तक होवय, ताकि ओ मन ल जादा ले जादा लाभ मिलय।
मुख्यमंत्री श्री साय ह कहिन कि ये बहुत खुशी के बात हे के छत्तीसगढ़ के गढ़बेंगाल के पंडी राम मांझी ल पद्मश्री ले सम्मानित करे गए हे। छत्तीसगढ़ के कला हमार देश के शान हे, एला पूरा दुनिया म पहिचान मिलना चाही।
विधानसभा अध्यक्ष डॉ. रमन सिंह ह कहिन के छत्तीसगढ़ के कलाकार मन के हाथ म चमत्कार हे। चाहे वो माटी के खिलौना के बात होवय या बेल मेटल, कसीदाकारी, गोदना अऊ टेराकोटा के, प्रदेश के हस्तशिल्पी अपन कला के बहुत सुंदर उत्पाद बनावत हें। छत्तीसगढ़ के हस्तशिल्प के राष्ट्रीय-अंतरराष्ट्रीय स्तर के प्रदर्शनी मन म भागीदारी होना चाही। हमार शिल्पकार मन तीर कुदरती हुनर हे। बड़ पैमाना म हस्तशिल्प उत्पादन बर डिज़ाइनर मन ल घलोक जोड़े के जरूरत हे।
ए बेरा म महिला अउ बाल विकास मंत्री श्रीमती लक्ष्मी राजवाड़े, सांसद श्रीमती कमलेश जांगड़े, विधायक श्री धरमलाल कौशिक, श्री सुनील सोनी, श्री आशाराम नेताम, श्री गजेंद्र यादव, कई ठन निगम-मंडल-आयोग के अध्यक्षगण, छत्तीसगढ़ हस्तशिल्प विकास बोर्ड के प्रबंध संचालक श्री जेपी मौर्य संग बहुत अकन गणमान्य नागरिक उपस्थित रहिन।
छत्तीसगढ़ म हस्तशिल्प विकास के अपार संभावना – मुख्यमंत्री श्री विष्णु देव साय
