- कोसा सिल्क के कपड़ा मन म विशेष छूट, ग्राहक मन म उछाह
- दिल्ली के छत्तीसगढ़ स्टेट एम्पोरियम म दस दिवसीय प्रदर्शनी-सह-विक्रय सेल के उद्घाटन
रायपुर, नई दिल्ली के राजीव गांधी हैंडीक्राफ्ट्स भवन स्थित छत्तीसगढ़ स्टेट एम्पोरियम म हाथकरघा अऊ हस्तशिल्प उत्पाद म ग्राहक मन बर छूट देहे जात हे। ग्राहक कम कीमत म सिल्क कोसा के कपड़ा के संग आन उत्पाद खरीद सकहीं। ये दस दिन के प्रदर्शनी-सह-विक्रय सेल के उद्घाटन डॉ. एम गीता आवासीय आयुक्त छत्तीसगढ़ शासन ह करिस। हस्तनिर्मित शिल्प ल अपनाए अऊ प्रोत्साहित करे बर ग्राहक मन ल उत्पाद मन म छूट देहे जात हे।
प्रदर्शनी-सह-विक्रय सेल म बेलमेटल ले लेके सिल्क कोसा के रेडीमेड कपड़ा मन के कई ठन वेराइटी उपलब्ध कराए गए हे। छत्तीसगढ़ राज्य के बुनकर मन कोति ले तियार करे रेडीमेड कपड़ा मन म सिल्क कोसा के ब्लाउज़, शर्ट, कुर्ता-कुर्ति, जैकेट, लुगरा आदि उपलब्ध हे। ए कपड़ा मन म छत्तीसगढ़ के कला अऊ संस्कृति ल हस्तकला के माध्यम ले उकेरे गए हे। राजधानी दिल्ली म छत्तीसगढ़ के हाथकरघा अऊ हस्तशिल्प उत्पाद मन के विशेष मांग हे, एला देखत छत्तीसगढ़ सरकार ह छत्तीसगढ़ स्टेट एम्पोरियम स्थापित करे हे। जेन ल लेके दिल्ली के ग्राहक मन म खासा उत्साह रहिथे। एम्पोरियम म कोसा के ड्रेस मटेरियल, हैंडलूम फेब्रिक, प्राकृतिक रंग ले तियार कपड़ा उपलब्ध हे, उहें सिल्क के लुगरा इहां कई रंग म हवय। ए लुगरा मन म आदिवासी संस्कृति के झलक स्पष्ट दिखथे। एमां खापा टैम्पल, जाला बूटा आदि कई वेराइटी के लुगरा घलोक बेंचावत हे।
एम्पोरियम म छत्तीसगढ़ के बेजोड़ धातु शिल्पकला ल घलोक आकर्षक ढंग ले प्रस्तुत करे गए हे। छत्तीसगढ़ के बेलमेटल शिल्पकला ले उत्कृष्ट मूर्ति बनाए जाथे। ग्रामीण शिल्पि मन के ए कलाकृति मन ल लेके मनखे मन म विशेष रूचि रहिथे। ए कलाकृति मन म आदिवासी जीवनशैली अऊ संस्कृति ले संबंधित, वन्यजीव, देवी-देवता मन के मूर्ति मन के झलक दिखथे।
