महासमुंद, जिला के दूरिहा के जंगल कोति के गांव मन म एक गांव हरदा ये जिहां पीए के पानी के समस्या अड़बड़ दिन ले गांव वाले मन बर चुनौती बने रहिस। फेर जल जीवन मिशन के तहत होए विशेष प्रयास ले आज हरदा गांव ल “हर घर जल“ गांव के रूप म घोषित करे गए हे। ये सफलता न केवल गांव के विकास के निशानी हे, भलुक गांव वाले मन के जीवन म एक नवा अध्याय घलोक ये।
पहिली गांव वाले मन ल पीए के पानी बर दूर-दराज के जलस्रोत ले पानी लाना परत रहिस। महिला मन ल रोज़ अड़बड़ दुरिहा ले पानी लाना परत रहिस, जेखर से उंखर समय अऊ ऊर्जा नष्ट होत रहिस। जल स्रोत सीमित होए अऊ सुविधा नइ होए के सेती कई पइत गांव वाले मन ल कठिनाइ के सामना करना परत रहिस। कार्यपालन अभियंता श्री देव प्रकाश वर्मा के मार्गदर्शन म हरदा म घर-घर तक पानी पहुंचाए बर नल कनेक्शन बिछाए के काम जल्दी पूरा करे गीस। वनांचल क्षेत्र होए के सेती पाइप लाइन बिछाए म चुनौती जरूर आईस, फेर अधिकारी मन अऊ पंचायत के समर्पण ह ए काम ल सफलतापूर्वक संपन्न करा दीस।
गांव म सबो घर तक नल कनेक्शन होए के बाद ग्राम पंचायत हरदा म “हर घर जल उत्सव“ मनाए गीस। ए कार्यक्रम म सरपंच मोंगरा बाई जगत अऊ सचिव अमर सिंह सिदार ह ए उपलब्धि के जानकारी गांव वाले मन के संग साझा करिन। अब गांव के हर घर म पाइपलाइन के माध्यम ले शुद्ध पेयजल पहुंचाए जात हे। ए योजना ले पानी के कमी के समस्या पूरा खतम हो गए हे, जेखर से गांव वाले मन के जीवनशैली म सकारात्मक बदलाव आए हे। योजना के संचालन बर ग्राम जल अउ स्वच्छता समिति के गठन करे गए हे, जेन ल अब पानी के आपूर्ति के पूरा जिम्मेदारी सौंपे गए हे। ठेकेदार के संचालन के जिम्मेदारी पंचायत ल सौंपत गांव के पंप ऑपरेटर के चयन घलोक करे गए हे। पंप ऑपरेटर के मानदेय अऊ रखरखाव बर प्रति घर 40 रुपिया के मासिक शुल्क तय करे गए हे।
ए अवसर म सरपंच, सचिव, मितानिन दीदि, जिला समन्वयक, अऊ गांव वाले मन ह उत्सव के रूप म जल के ए उपलब्धि के जश्न मनाइन। सबो मिलके ये सुनिश्चित करे के संकल्प लीन के गांव म पानी के आपूर्ति निरंतर बने रहय अऊ भविष्य म कोनो ल जल संकट के सामना झन करना परय। हरदा गांव अब “हर घर जल“ के सफल मॉडल बन गए हे, जहां हर घर म पीए के साफ पानी उपलब्ध हे। ए परियोजना ह गांव के जीवन ल खुशहाल बना देहे हे। महिला मन ल अब पानी बर दूरिहा नइ करना परत हे, अऊ ऊंखर समय के बचत ले ओ मन आन गतिविधि मन म जादा योगदान दे पात हें।
महासमुंद : ‘हर घर जल’ के सफल मॉडल बनिस हरदा ग्राम
