देश सेवा के भावना ले महिला मन बनावत हें तिरंगा
रायपुर, मुख्यमंत्री श्री भूपेश बघेल ह प्रदेश वासी मन ले 11 ले 17 अगस्त के बीच वाले स्वतंत्रता हफ्ता के समय अपन घर, संस्थान, दुकान मन म राष्ट्रीय ध्वज फहराके हमर तिरंगा अभियान ल सफल बनाए के आग्रह करे हें। मुख्यमंत्री श्री भूपेश बघेल ह प्रदेश वासी मन ल स्वतंत्रता हफ्ता बर तियार विशेष डीपी फ्रेम के उपयोग अपन डीपी म करे के अपील घलोक करे हें। प्रोफाईल फोटो बनाए बर http://twb.nz/hamar-tiranga म किलिक करे जा सकत हे।
हर घर झंडा कार्यक्रम के आयोजन
आजादी के अमृत साल ल यादगार बनाए बर हर घर झंडा कार्यक्रम के आयोजन करे जात हे। ये साल स्वतंत्रता दिवस म हर घर झंडा कार्यक्रम अंतर्गत छत्तीसगढ़ के स्व-सहायता समूह के दीदी मन के बनाए तिरंगा झंडा फहराए जाही। ये अभियान ल सफल बनाए बर छत्तीसगढ़ के सबो जिला मन के महिला स्वसहायता समूह के दीदी मन देश भक्ति के भावना के संग तिरंगा झंडा तियार करत हें संगेच खुद ल आर्थिक रूप ले उमन सशक्त करत हें। दंतेवाड़ा जिला के पार्वती स्व-सहायता समूह के दीदि मन तको तिरंगा झंडा बनावत हें। ये दीदी मन झंडा बनाए के काम ल सिरिफ काम भर नही भलुक देश सेवा के रूप म देखत हें।
महासमुन्द जिला के कोमाखान के महिला स्व सहायता समूह के श्रीमती यामिनी साहू ह बताइस कि ओ ल अभी हाले म डेढ़ हजार झण्डा बनाए के ऑर्डर मिले हे, एखर बाद अऊ ऑर्डर मिलइया हे। वो ह खुशी जाहिर करत बताइस कि वोखर समूह के महिला मन के बनाए झण्डा, जिला के घर अऊ सरकारी कार्यालय म फहरही। ये ऊंखर बर गौरव के बात ये। झंडा बनाए के ये काम जिहां एक कोति राष्ट्रभक्ति के भावना ल जागृत करत हे तो उहें दुसर कोति महिला मन ल रोजगार घलोक देवत हे। जेमां राष्ट्रीय ध्वज तियार करे के जिम्मेदारी महिला स्व-सहायता समूह मन ल देहे गए हे।
रायपुर जिला म सेरीखेड़ी के उजाला ग्राम संगठन ले जुड़े महिला समूह मन के दीदि मन तको झण्डा के सिलाई के काम करत हे। जल्दी ये झण्डा अपन घर म फहराए बर मनखे मन ल उपलब्ध होही। जिला प्रशासन के मदद ले तिरंगा झंडा बनाए के काम उजाला ग्राम संगठन के तीस महिला मन ह शुरू करे हें। 8 अगस्त तक महिला मन ह करीबन 60 हज़ार झंडा बनाए के लक्ष्य रखे हें। ए झंडा ल बनाए बर माप आदि के तकनीकी जानकारी अऊ मार्गदर्शन जिला पंचायत के आजीविका मिशन ले जुड़े अधिकारी मन ह देवत हें। स्व सहायता समूह के महिला मन खादी अऊ पॉलिस्टर कपड़ा के दू प्रकार के तिरंगा झण्डा बनावत हें। आजीविका मिशन ले जुड़े अधिकारी मन ह बताइस कि तिरंगा झंडा बनाए बर खादी के कपड़ा स्थानीय स्तर म खादी ग्रामोउद्योग बोर्ड ले बिसाए गए हे अऊ पॉलिस्टर के कपड़ा दूसर कपड़ा मिल ले मंगाए गए हे। झण्डा 20 इंच ऊँचाई अऊ 30 इंच चौड़ाई के निरधारित माप म बनाये जाही।
महिला समूह मन के सदस्य मन कोति ले बनाये गए ए झंडा मन ल किफायती दर म सी मार्ट के संग गाँव-गाँव के उचित मूल्य के राशन दुकान म बिक्री बर उपलब्ध कराए जाही। नगरीय निकाय अऊ शासकीय कार्यालय मन म घलोक स्टॉल लगाके शासकीय अधिकारी-कर्मचारी मन संग आम जन ल झण्डा उपलब्ध कराए जाही।
जानबा हे कि स्वतंत्रता के 75 साल पूरा होए के अवसर म देश भर म आजादी के अमृत महोत्सव मनाए जात हे। ये महोत्सव के तहत 11 ले 15 अगस्त तक हर घर तिरंगा अभियान चलही। अभियान के समय देश के नागरिक अपन-अपन घर म तिरंगा झण्डा फहराके आजादी के जश्न मनाहीं। अपन घर म लइका मन अऊ नवा पीढ़ी के मनखे मन ल कई बलिदान के बाद मिले आजादी के महत्व बताए जाही अऊ राष्ट्रध्वज के गौरव, मान-सम्मान के रक्षा बर सर्वस्व न्यौछावर करइया राष्ट्र भक्ति के भावना जगाए जाही।