छत्तीसगढ़ म ‘हरेली बर्ड फेस्टिवल 2026’ के सफल समापन, 33 जिला म दर्ज होईस 211 चिरई मन के प्रजाति

रायपुर, छत्तीसगढ़ म पर्यावरण अउ जैव विविधता के संरक्षण बर 14 ले 16 अगस्त 2026 तक चले तीन दिन के ‘हरेली बर्ड फेस्टिवल 2026’ के सफल समापन हो गे। वन अउ जलवायु परिवर्तन विभाग के मार्गदर्शन अउ वन मंत्री श्री केदार कश्यप के अगुवई म आयोजित ए अभियान म राज्य के जम्मो 33 जिला म 45 बर्ड वॉक आयोजित करे गीस, जेमा 1,000 ले जादा लोगन मन सामिल होइन। नवा रायपुर के नंदनवन जंगल सफारी म दिव्यांगजन मन बर घलो खास बर्ड वॉक रखे गे रहिस।
नागरिक विज्ञान मंच eBird के 954 चेकलिस्ट के माध्यम ले प्रदेश म 211 चिरई प्रजाति मन के दस्तावेजीकरण करे गीस। एमा पेंटेड स्टॉर्क, रेड-नेप्ड आइबिस, कॉटन पिग्मी-गूज, इंडियन पैराडाइज-फ्लाईकैचर अउ ग्रेटर रैकेट-टेल्ड ड्रोंगो जइसन दुलर्भ प्रजाति मन दर्ज करे गीस। कोपरा जलाशय, चिच्छा वेटलैंड, बारनवापारा अभयारण्य अउ अचानकमार टाइगर रिजर्व जइसन प्रमुख क्षेत्र मन म सर्वे करे गीस।
ए अभियान ल स्थानीय आजीविका ले घलो जोड़े गीस, जेमा रायपुर के मांढर स्थित अड़बंधा तालाब म ‘कलश स्वयं सहायता समूह’ के महिला मन फूड कार्ट चला के भागीदारी निभाइन। ए आयोजन ले मिले आंकड़ा मन के आधार म अब राज्य के वेटलैंड्स के नियमित निगरानी, ‘पक्षी मित्र’ नेटवर्क के विस्तार अउ पर्यावरण जागरूकता ल अउ बढ़ावा देहे जाही।