मुख्यमंत्री निवास म हरेली तिहार: छत्तीसगढ़ी व्यंजन के सुगंध ले सराबोर हरेली तिहार

छत्तीसगढ़ी व्यंजन के स्वाद ले सजे पारंपरिक थाली छत्तीसगढ़ी पाक शैली जेन ठेठरी, खुरमी, पिड़िया, अनरसा, खाजा, करी लड्डू, मुठिया, गुलगुला भजिया, चीला – फरा, बरा अउ चौसेला म जीवंत रहिस।
रायपुर, छत्तीसगढ़ के धरती म जब भी कोनो तिहार आथे त वो ह केवल धार्मिक या सांस्कृतिक तिहार भर नइ होवय, बल्कि ओ ह जीवनशैली, परंपरा, स्वाद अऊ सामाजिक सौहार्द के परब बन जाथे। इही कड़ी म प्रदेश के प्रमुख कृषि परब हरेली तिहार के बेरा म मुख्यमंत्री श्री विष्णु देव साय के निवास म पारंपरिक स्वादिष्ट छत्तीसगढ़ी व्यंजन मन ह जम्मो अतिथि मन के मन ल मोह लीस।
प्रदेश के अतुलनीय पाक परंपरा ल जीवंत करत इहां आगंतुक मन के स्वागत बर खास रूप ले ठेठरी, खुरमी, पिड़िया, अनरसा, खाजा, लड्डू करी, मुठिया, गुलगुला भजफिया, चीला-रा, बरा अउ चौसेला जइसे दर्जनों पारंपरिक व्यंजन मन के व्यवस्था करे गे रहिस। बांस के सूपा, पिटारी अऊ दोना-पत्तल म परोसे गे ये व्यंजन मन ह न केवल स्वाद बल्कि प्रस्तुति म घलो लोक जीवन के भावना ल उजागर करिस। पहुना मन ह गरमागरम व्यंजन मन ल चिखके राज्य के पारंपरिक व्यंजन के खुले मन ले सराहना करिन।
मुख्यमंत्री श्री साय ह खुद ये व्यंजन मन ल चिखिन अऊ कहिन के हरेली तिहार सिर्फ खेती-किसानी के तिहार नो हे, बल्कि ये हमर लोक संस्कृति, हमर परंपरा अऊ आत्मीयता के अभिव्यक्ति हे। ये पारंपरिक व्यंजन म हमर माता-बहिनी मन के मेहनत, सादगी अऊ समृद्ध स्वाद के परंपरा छिपे हे, जेन हमर असली पहचान हे।
ए बेरा म परिसर के हर कोना छत्तीसगढ़ी संस्कृति के सुगंध ले सराबोर रहिस। कहूं ढोल-मंजीर के धड़कन म लोक नृत्य दिखत रहिस त कहूं व्यंजन के सुगंध मनखे मन ल अपन कोति खींचत रहिस। पारंपरिक पोशाक पहिने ग्रामीण कलाकार अउ सांस्कृतिक प्रस्तुति ह पूरा माहौल ल जीवंत अउ आत्मीय बना दिस। कार्यक्रम म शामिल वरिष्ठ अधिकारी, जनप्रतिनिधि, कलाकार अउ आमजन मन ह ए आयोजन ल एक यादगार सांस्कृतिक अनुभव कहिन।