हरेली तिहार के दिन स्कूल मन म होही गेड़ी नृत्य अउ गेड़ी दंउड़

मुख्यमंत्री ह मंत्री परिषद के बैठक म दीन हुकुम
छत्तीसगढ़ के संस्कृति ल बढ़ावा देहे के पहल

रायपुर, मुख्यमंत्री श्री भूपेश बघेल ह राज्य के सबो स्कूल मन म अवईया 28 जुलाई के हरेली परब के बेरा म स्कूल म पढ़ईया लईका मन के बीच गेड़ी नृत्य अउ गेड़ी प्रतियोगिता के आयोजन करे के हुकुम देहे हें। एकर उद्देश्य छत्तीसगढ़ के कला अऊ संस्कृति ल प्रोत्साहित करना अऊ आगू बढ़ाना हे। मुख्यमंत्री अपन निवास कार्यालय म काली आयोजित मंत्री परिषद के बैठक म हेरली परब ल राज्य म परंपरागत ढंग ले मनाए ल लेके परखर गोठ बात करिन। उमन हरेली परब के अवसर म विशेष रूप ले आयोजित होवइया गेड़ी नृत्य अउर गेड़ी प्रतियोगिता के आयोजन स्कूल मन म करे ल कहे हें।
छत्तीसगढ़ राज्य निर्माण के लम्बा समे के बाद घलोक राज्य के सांस्कृतिक विविधता अऊ गौरवशाली परंपरा मन ल सहजे अऊ संरक्षित करे के दिशा म अपेक्षित काम नइ हो सके हे। मुख्यमंत्री श्री भूपेश बघेल के सियानी म छत्तीसगढ़ सरकार ह छत्तीसगढ़ के परंपरा, संस्कृति अऊ लोककला ल सरलग बढ़ावा देवत हे।