मुख्यमंत्री निवास म लगीस कृषि यंत्र के प्रदर्शनी
किसान मन ल अनुदान म 1600 ट्रेक्टर देहे के लक्ष्य
रायपुर, 04 अगस्त 2024। मुख्यमंत्री श्री विष्णु देव साय के रायपुर स्थित निवास कार्यालय म धूम-धाम ले हरेली तिहार मनाए गीस। निवास परिसर ल बड़ सुग्घर ढंग ले सजाए गए रहिस। इहां मेला-मड़ई जइसे नजारा देखे ल मिलिस। पारंपरिक लोक यंत्र के संग सुंदर नाचा के आयोजन होइस। पूरा परिसर म उत्सव के माहौल रहिस।
मुख्यमंत्री निवास म ग्रामीण परिवेश जीवंत हो उठे रहिस हे। कहूं सुंदर कुरथा म सजे राऊत नाच नाचत कलाकार मन के रंगत रहिस त कहूं आदिवासी कलाकार अपन पारंपरिक लोक नृत्य करत नजर आइन। छत्तीसगढ़ के अद्भुत ग्रामीण लैंडस्केप अपन सम्पूर्ण सांस्कृतिक सुंदरता म इहां देखाइ दीस। अलग अलग प्रकार के धुन म छत्तीसगढ़ी संगीत के माधुर्य अपन चरम म रहिस।
मुख्यमंत्री निवास म हरेली पर्व के अवसर म कृषि यंत्र के प्रदर्शनी घलोक लगाए गीस। मुख्यमंत्री श्री विष्णु देव साय ए लोक पर्व के अवसर म छत्तीसगढ़ के किसान मन ल उन्नत कृषि यंत्र के सौगात घलोक दीन। किसान मन ल कृषि यंत्रीकरण मिशन के तहत 20 टेक्टर अउ एक हारर्वेस्टर के वितरण घलोक करिन। कृषि यंत्रीकरण मिशन के तहत राज्य के 1600 किसान मन ल टेक्टर देहे के लक्ष्य हे। सीमांत, महिला, अनुसूचित जाति अउ जनजाति वर्ग के किसान मन ल टेक्टर 50 प्रतिशत अनुदान म अउ आन वर्ग के किसान मन ल 40 प्रतिशत अनुदान म देहे जाही।