मुख्यमंत्री निवास मा धूमधाम ले मनाए गिस हरेली तिहार, लोक संस्कृति अउ परंपरा के दिखिस सुघ्घर रंग

रायपुर, छत्तीसगढ़ के पहिली लोक तिहार हरेली के अवसर मा नवा रायपुर स्थित मुख्यमंत्री निवास मा भव्य कार्यक्रम के आयोजन करे गिस। मुख्यमंत्री विष्णु देव साय ह विधि-विधान ले भगवान शिव, गौमाता अउ नांगर-रापा संग सब्बो कृषि औजार के पूजा-अर्चना करके प्रदेश मा सुघ्घर पानी, बने फसल अउ सुख-समृद्धि के कामना करिन। ए बेरा मा विधानसभा अध्यक्ष डॉ. रमन सिंह, मंत्रीगण अउ भारी संख्या मा नागरिकमन मौजूद रहिन।
मुख्यमंत्री श्री साय अउ डॉ. रमन सिंह ह पारंपरिक छत्तीसगढ़ी पोषाक मा महिला ऑटो चालक के पिंक ऑटो मा बइठके कार्यक्रम स्थल पहुँचिन, जेखर से आयोजन मा खास आत्मीयता के रंग घुलगे। मुख्यमंत्री ह गौशाला जाके गाय अउ बछरू मन ल हरा चारा अउ पारंपरिक ‘लोंदी’ खवाके पशुधन संरक्षण के संदेश दीन। एखर संगेच पर्यावरण ल सहेजे बर परिसर मा पारिजात के पौधा घलो लगाइन।
कार्यक्रम मा मुख्यमंत्री ह कृषि यंत्रीकरण ल बढ़ावा देवत रायपुर के किसान इंद्र कुमार वर्मा ल हार्वेस्टर सब्सिडी बर 16 लाख रुपिया के चेक सउंपिन। ओमन ड्रोन दीदी चंद्रकली वर्मा ले संवाद करके उंखर सफलता के सराहना करिन। ए अउसर मा गेड़ी, बिल्लस अउ बाटी जइसे पारंपरिक खेल अउ ठेठरी, खुरमी जइसे छत्तीसगढ़ी पकवान आयोजन के मुख्य आकर्षण रहिस। लोक कलाकारमन के मांदर अउ ढोलक के थाप मा मुख्यमंत्री घलो पारंपरिक धुन मा थिरकिन।