- छत्तीसगढी़ ग्रामीण खेलकूद अऊ सांस्कृतिक कार्यक्रम आयोजित करे जाही, छत्तीसगढ़ी कलेवा के स्टॉल घलोक लगही
- राज्य भर म मनाये जाही ‘हरेली तिहार‘
रायपुर, ये साल एक अगस्त के दिन अवइया हरेली तिहार छत्तीसगढि़या कलेवर अऊ छत्तीसगढ़ी रंग ले सजे-संवरे नजर आही। हम बतादेथन के हरेली छत्तीसगढ़ के प्रमुख तिहार मन म ले एक हे। ये साल राज्य शासन कोति ले जिहां हरेली म सार्वजनिक अवकाश के घोषणा करे गए हे, उन्हें कृषि उपर आधारित ये तिहार ल ‘‘हरेली तिहार‘‘ के माध्यम ले छत्तीसगढ़ी संस्कृति के संरक्षण अऊ संवर्धन के उद्देश्य ले घलोक राज्य म मनाए के निर्णय ले गए हे।
मुख्यमंत्री श्री भूपेश बघेल ह ये संबंध म संबंधित विभाग मन के अधिकारी मन ल निर्देशित करे हें कि ये साल हर जिला मुख्यालय, विकासखण्ड मुख्यालय अऊ ग्राम पंचायत म एला ‘‘हरेली तिहार‘‘ के नाम ले आयोजित करे जाए। एखर माध्यम ले संझा कन छत्तीसगढ़ के ग्रामीण खेल-कूद के आयोजन करे जाही, छत्तीसगढ़ी कलेवा मन के स्टॉल लगाए जाही, खेल-कूद स्पर्धा मन म पुरस्कार वितरण करे जाही अऊ प्रतीकात्मक पौधारोपण ल प्राथमिकता दीए जाही। ये बेरा म गेड़ी दौड़ जदसे ग्रामीण खेलकूद प्रतियोगिता घलोक आयोजित करे जाही अऊ छत्तीसगढ़ी सांस्कृतिक कार्यक्रम मन के आयोजन घलोक करे जाही। अइसनहे गांव मन म नवा बने गौठान मन के लोकार्पण घलोक करे जाही।
ए कार्यक्रम मन म मुख्यमंत्री संग मंत्रीगण अऊ आन अतिथि घलोक सामिल होहीं। राज्य शासन कोति ले हरेली तिहार के आयोजन बर पंचायत अऊ ग्रामीण विकास, कृषि, पशुधन विभाग, संस्कृति अऊ जनसम्पर्क विभाग के भागीदारी सुनिश्चित करे गए हे। एकर बर पंचायत अऊ ग्रामीण विकास विभाग ल नोडल विभाग बनाये गए हे।