- पांच नदिया के पार म फलदार पौधा मन के होही रोपण
- 594 नदिया-नरवा के पार म 23 हजार हेक्टेयर क्षेत्र म पौधरोपण के लक्ष्य
- मुख्यमंत्री ह औद्योगिक संस्था मन ले कहिन: पर्यावरण के रक्षा म सहभागिता निभावयं
रायपुर, हरियर छत्तीसगढ़ अभियान के तहत ये साल छत्तीसगढ़ राज्य म 7 करोड़ 13 लाख पौधा के रोपण के लक्ष्य रखे गए हे। राज्य के प्रमुख पांच नदिया मन इन्द्रावती, अरपा, खारून, शिवनाथ अऊ सकरी नदी के करार पार 633 हेक्टेयर क्षेत्र म 7 लाख 38 हजार 826 पौधा मन के रोपण करे जाही, ये मां फलदार पौधा मन के रोपण ल प्राथमिकता दिए जाही। राज्य के 594 नदिया-नरवा के करार पार करीबन 23 हजार हेक्टेयर क्षेत्र म पौधरोपण करे जाही। राज्य के प्रमुख अउ बड़े तकनीकी शिक्षण संस्था मन जइसे आईआईएम, आईआईआईटी, चिकित्सा महाविद्यालय कैम्पस बस्तर, चिकित्सा महाविद्यालय राजनांदगांव, जंगल सफारी संग सबो नगरीय निकाय मन के प्रमुख उद्यान मन म घलोक पौधरोपण करे जाही।
मुख्यमंत्री श्री भूपेश बघेल के अध्यक्षता म आज मंत्रालय म आयोजित हरियर छत्तीसगढ़ पौधरोपण कार्यक्रम के बैठक म ये जानकारी दिए गीस। श्री बघेल ह निर्देश दीन कि वृक्षारोपण बर अइसन जगा मन के चयन करे जाए जिहां पौधा ल बढ़ोतरी बर अनुकूल वातावरण मिल सकय। पौधरोपण के बाद पौधा मन के जीवित रहे अऊ बढ़ोतरी करे के गति के निगरानी करे जाय। उमन शहरी अऊ ग्रामीण दुनों क्षेत्र मन म फलदार पेड़ मन के रोपण उपर जोर दीन। उमन औद्योगिक संस्थान मन ल घलोक हरियर छत्तीसगढ़ अभियान म अपन भागीदारी निभाए के आग्रह करिन।
मुख्यमंत्री ह निर्माणाधीन आवासीय कालोनी मन म घलोक अनिवार्य रूप ले पौधरोपण अऊ जल संरक्षण के काम करे म जोर देहे ल कहिन। अइसनहे राज्य म बनाए जात गोठान म विशेष रूप ले फलदार वृक्ष लगाय के निर्देश दीन। उमन गुरूर अऊ धरसींवा विकासखण्ड म विशेष रूप ले जल स्तर के बढ़ोत्तरी बर सहायक पौधा मन के रोपण के निर्देश दीन।
वन विभाग के अपर मुख्य सचिव श्री आर. पी. मण्डल ह बताइस कि पौधरोपण के काम मुख्य रूप ले वन विभाग, वन विकास निगम अऊ पंचायत अउ ग्रामीण विकास विभाग कोति ले करे जाही। आन विभाग मन ल घलोक पौधरोपण बर पौधे देहे जाही।
बैठक म पौधरोपण के काम म औद्योगिक संस्थान मन ल अपेक्षित सहयोग देहे के निर्देश दे गीस।औद्योगिक संस्थान मन कोति ले उत्पादित सामान अऊ ये काम म होवत प्रदूषण के आधार म ओ मन ल अपन-अपन क्षेत्र मन म पौधरोपण करे के समझाइश देहे गए हे।
बैठक म वन मंत्री मोहम्मद अकबर, मुख्य सचिव श्री सुनील कुमार कुजूर, एनएमडीसी के सीएमडी श्री एन बैजेन्द्र कुमार, विशेष सचिव उद्योग श्रीमती अलरमेल मंगई डी संग राज्य म कार्यरत् भिलाई स्टील प्लांट, एनटीपीसी, एसईसीएल, बालको, जायसवाल निक्को, एसकेएस पावर, जिंदल स्टील एन्ड पावर, बंजरंग पावर एन्ड इस्पात, राजस्थान राज्य विद्युत उत्पादन निगम लिमिटेड, सारडा एनर्जी एन्ड मिनिरल्स, गोदावारी पावर एन्ड इस्पात कम्पनियों के प्रतिनिधि अऊ वन विभाग के वरिष्ठ अधिकारी उपस्थित रहिन।