गंगूराम ल हरियर सोना के बलदा मिलीस खरा रूपिया

• तेन्दूपत्ता ले मिले राशि लइका मन अऊ खेती-किसानी के उपयोग म खरचा करहीं
• जिला के 17985 तेन्दूपत्ता संग्राहक मुखिया मन ल 9.68 करोड़ राशि के भुगतान

नारायणपुर, नारायणपुर जिला के गांव बोरगांव निवासी श्री गंगूराम उसेण्डी परिवार के 12 सदस्य मन ह मई महिना के मात्र 4-5 दिन म मूल्यवान तेन्दूपत्ता के तोड़ाई करके 5760 तेन्दूपत्ता गड्डी बनाके (पौने छै मानक बोरा) नजदीक फड़ म बेचिस। एखर बलदा ओ ल प्रति मानक बोरा रूपिया 4000 के दर ले 23040 रूपिया नकद मिल गे। अपन प्रतिक्रिया म वो ह बताइस कि वो अऊ ऊंखर परिवार अड़बड़ खुश हे। पहिली प्रति मानक बोरा रूपिया 2500 मिले रहिस, फेर अब 1500 रूपिया प्रति मानक बोरा म बढ़के मिले हे। वो ह बताइस कि ओखर परिवार जादा तेन्दूपत्ता तोड़के एकर लाभ उठाना चाहत रहिस, फेर ऊंखर इलाका म तेन्दूपत्ता के मात्रा कम होए अऊ तोड़ईया मन के संख्या जादा होए के सेती जादा तेन्दूपत्ता नइ तोड़ पाये ये। फेर ओ ह अतका राशि पाके अड़बड़ मगन हे। वोखर परिवार के सबो सदस्य मन ह तेन्दूपत्ता तोड़ाई के काम करे हें। उमन सुरता करत बताइन कि पाछू साल ओ मन तेन्दूपत्ता के तोड़ाई करे रहिन। जेमा ओ मन ल करीबन 8 हजार रूपिया मिले रहिस। गंगूराम उसेण्डी ह बताइस कि तेन्दूपत्ता ले मिले राशि ल वो ह अपन लइका मन उपर अऊ खेती-किसानी के उपयोग म खरच करही।

नारायणपुर जिला म 23100 हजार मानव बोरा तेन्दूपत्ता के आवक के अनुमान ले जादा 1208 मानक बोरा के आवक होए हे मने कि 24308 मानक बोरा संग्रहित करे गए हे। जिला के करीबन 17985 तेन्दूपत्ता संग्राहक मुखिया के परिवार 08 प्राथमिक वनोपज सहकारी समिति मन म सदस्य के रूप म सामिल हे । नारायणपुर जिला के 17985 तेन्दूपत्ता संग्राहक मुखिया मन ल कुल भुगतान राशि रूपिया 9 करोड़ 72 लाख 32 हजार 414 म ले अब तक 9 करोड़ 68 लाख 76 हजार 169 रूपिया के राशि के नकद भुगतान कर दे गए हे। बांचे राशि रूपिया 3,56,247 रूपिया के भुगतान के कार्रवाई करे जात हे।