रायपुर, 07 अगस्त 2024। राज्यपाल श्री डेका ह आज राजभवन म कार्यरत अधिकारी मन अउ कर्मचारी मन के परिचयात्मक बैठक लीन। उमन जलवायु बदलाव अउ पर्यावरण प्रदूषण के दुष्प्रभाव ले बांचे बर हरेक नागरिक के सहभागिता उपर जोर दीन। ए अवसर म राज्यपाल के सचिव श्री यशवंत कुमार, विधिक सलाहकार श्री भीष्म प्रसाद पाण्डेय, संग राजभवन के अधिकारी उपस्थित रहिन।
राज्यपाल श्री डेका ह कहिन कि ऊर्जा के बचत बर सबो ल प्रयास करना होही। अनावश्यक बिजली खर्च नइ करना चाही। एखर अलावा प्लास्टिक प्रदूषण ले बचे बर पानी के बोतल के यथासंभव कम उपयोग करना चाही। अपन आस-पास के वातावरण म स्वच्छता के ध्यान रखना चाही।
उमन कहिन कि प्रधानमंत्री श्री नरेन्द्र मोदी जी के आव्हान म ‘‘एक पेड़ मां के नाम‘‘ अभियान के तहत सबो ल पेड़ लगाना चाही अऊ आन मनखे मन ल घलोक प्रेरित करना चाही। राज्यपाल श्री डेका ह राज्य म विशेषकर आदिवासी क्षेत्र मन म रेडक्रॉस के गतिविधि मन ल बढ़ाए उपर बल दीन अऊ कहिन कि आदिवासी क्षेत्र मन म महिला मन के स्वास्थ्य के देखभाल बर रेडक्रॉस सक्रिय भूमिका निभावय। उमन प्रधानमंत्री टी.बी. मुक्त भारत अभियान के तहत छत्तीसगढ़ म होवत काम मन के जानकारी लीन।
राज्यपाल ह कहिन कि राज्य म जैविक खेती ल बढ़ावा देहे बर अऊ जादा प्रयास करना होही। राज्य के आकांक्षी जिला मन म जेन काम चलत हे उंखर नियमित रूप ये मॉनिटरिंग करे जाय। राज्यपाल ह कहिन कि राज्य के सबो विश्वविद्यालय मन म खाली पद मन म भर्ती बर कार्रवाई बर विश्वविद्यालय ल निर्देशित करे जाए ताकि पढ़ईया लदका मन ल गुणवत्तापूर्ण शिक्षा मिल सकय। उमन कार्यालय म डिजिटाइजेशन अऊ डिजिटल लाइब्रेरी बनाए के दिशा म काम करे बर कहिन। एखर अलावा सबो ल साइबर अपराध के प्रति सतर्क रहे अऊ दूसर मन ल घलोक जागरूक करे बर प्रेरित करे ल कहिन।
राज्यपाल श्री डेका ह आज के समाचार पत्र म प्रकाशित नारायणपुर जिला म नक्सली मन ले लड़ के अपन पिता के जान बचइया साहसी बालिका के खबर ल जानके, ओला राजभवन म बलाके सम्मानित करे के निर्देश दीन।
ए अवसर म राज्यपाल के उप सचिव श्रीमती हिना अनिमेष नेताम अउ राजभवन के सबो अधिकारी-कर्मचारी उपस्थित रहिन।
