हवई अड्डा अउ रेल्वे टेशन मन म चालू करे जाही आरटीपीसीआर टेस्टिंग : मुख्यमंत्री दाउ भूपेश बघेल

रइपुर, 9 अप्रैल 2021 शुकवार। मुख्यमंत्री दाउ भूपेश बघेल ह प्रदेश म कोरोना संक्रमण के रोकथाम अउ बचाव अउ कोरोना संकट के दौर म आर्थिक गतिविधि मन के संचालन के संबंध म आज राजधानी रइपुर के कइयो टिन मीडिया संस्थान के सम्पादक मन सगं वर्चुअल बइठका म विचार-विमर्श करीन अउ उन्कर सुझाव मांगीन। मुख्यमंत्री ह कहीन कि अभीन के बेरा म कोरोना संक्रमण म आवत तेजी ह चिंताजनक हवय। राज्य सरकार कोति ले कोरोना संक्रमण के रोकथाम अउ मरीज मन के इलाज बर सबो आवश्यक उपाय अउ प्रबंध देहे जावत हावय। सामाजिक संगठन मन तको एमा सहयोग लेहे जावत हावय। दाउ बघेल ह मीडिया ले कोरोना संक्रमण ले बचाव अउ कोरोना टीकाकरण अभियान के संबंध म जनजागरूकता बर सहयोगी बने के अपील करीन । मुख्यमंत्री ह कहीन कि येह आपदा के बेरा हरे, तेकर सेति निजी अस्पताल मन ल मरीज मन के इलाज म मानवीय दृष्टिकोण अपनाना चाही।
मुख्यमंत्री ह बइठा म कहीन कि प्रदेश म वैक्सीनेशन, टेस्टिंग अउ मरीज मन के इलाज बने ढंगलगहा प्रबंध करे गे हावय। राज्य सरकार के पूरा प्रयास हे कि मरीज मन ल राहत ​मिलै। वेन्टीलेटर अउ ऑक्सीजन बेड के कमी नइ हे। कोरोना संक्रमण ल थाम्हे बर फंड के कोई कमी नइ होवय। उन मन कहीन कि निजी अस्पताल मन म कोविड-19 के टेस्टिंग अउ इलाज बर दर तय करे के पहल करे जाही। इही तरह रेमडेसिवियर इंजेक्शन के तको दर तय करे जाही। शासकीय अउ निजी अस्पताल मन म रेमडेसिवियर के 4500 डोज उपलब्ध हवय, राज्य सरकार के प्रयास हे कि जरूरतमंद मन ल ये दवई के डोज मिल सकै। कोरोना जांच, इलाज अउ कोरोना टीकाकरण के सुविधा बढ़ाए बर आवश्यक कदम उठाए जावत हवय। उन मन बताइन कि प्रधानमंत्री जी ले वैक्सीनेशन के न्यूनतम उमर 18 बछर निर्धारित करे के उन मन अनुरोध करे हावय
संगे संग उन मन एहू कहीन कि नर्सिंग के पास आउट विद्यार्थी अउ आने सेवा मन म कार्यरत डॉक्टर मन के तको सहयोग लेहे जाही।
उन मन बताइन के छत्तीसगढ़ म टेस्टिंग के औसत राष्ट्रीय औसत ले बनेच हावय।
उन एहू जानबा कराइन कि राज्य म अब तक वैक्सीन के 37.27 लाख ले अधिक डोज देहे गे हावय।