हाट-बाजार मन म लगत स्वास्थ्य शिविर मन ले आखरी छोर के मनखे तक पहुंचत हे स्वास्थ्य सुविधा

बिलासपुर, छत्तीसगढ़ म सबला स्वास्थ्य सुविधा उपलब्‍ध कराए बर कई ठन स्वास्थ्य योजना के संचालन करे जात हे। ग्रामीण क्षेत्र मन म अऊ दूर दराज के दुर्गम इलाका मन म रहइया मनखे मन ल स्वास्थ्य सुविधा उपलब्‍ध कराए बर मुख्यमंत्री हाट बाजार क्लीनिक योजना संचालित हे। ग्रामीण क्षेत्र मन म लगइया हाट बाजार मन म आये गांव वाले मन के इलाज करे बर जिला अस्पताल ले मोबाईल क्लीनिक लगाए जाथे, जेमां चिकित्सक, पैरामेडिकल स्टॉफ चिकित्सा उपकरण अऊ दवई लेके जाथें अऊ डाक्‍टर मन के जांच के बाद मरीज के इलाज अऊ जरूरी दवइ देहे जाथे अऊ जरूरत परे म मरीज ल दूसर अस्पताल म रिफर करे जाथे। प्रदेश म 14 लाख 86 हजार 238 ले जादा मरीज मन के इलाज हाट बाजार क्लीनिक मन म करे जा चुके हे।
बिलासपुर जिला म घलोक ये साल अब तक 24 हाट-बाजार मन म 426 मोबाइल क्लीनिक लगाके करीबन 53 हजार 953 गांव वाले मन ल प्राथमिक उपचार अऊ स्वास्थ्य संबंधी परामर्श अऊ निःशुल्क दवई देहे गए हे। जेमां 26 हजार 152 महिला अऊ 27 हजार 801 पुरूष सामिल हे। मुख्यमंत्री हाट-बाजार क्लीनिक योजना के तहत जिला म जरूरत मुताबिक अऊ गांव ले स्वास्थ्य केन्द्र के दूरी के आधार म 24 हाट बाजार मन के चिन्हांकन करे गए हे। हर एक हफ्ता डेडिकेटेड टीम के माध्यम ले ए हाट बाजार मन म गांव वाले मन के स्वास्थ्य परीक्षण अऊ ओ मन ल जरूरी उपचार के सुविधा प्रदान करे जात हे।