कोरोना वायरस संक्रमण ले बचे बर वीडियो कॉन्फ्रेसिंग के संग लोकार्पण
कांकेर, महासमुंद, बिलासपुर, दुर्ग, कोरबा अऊ जशपुर म घलोक अब डायलिसिस सुविधा
रायपुर, 17 मार्च 2020। स्वास्थ्य मंत्री श्री टी.एस. सिंहदेव ह आज इहां अपन निवास कार्यालय म वीडियो कॉन्फ्रेसिंग के संग छै जिला चिकित्सालय मन म निःशुल्क डायलिसिस सुविधा के शुभारंभ करिन। ‘जीवन धारा’ नाम ले शुरु होए ये नवा सुविधा बर राष्ट्रीय मुफ्त डायलिसिस कार्यक्रम के तहत जिला अस्पताल मन म डायलिसिस मशीन स्थापित करे गीस। कांकेर, महासमुंद, दुर्ग, बिलासपुर, कोरबा अऊ जशपुर म डायलिसिस के सुविधा शुरू होए ले किडनी रोग ले पीड़ित मन ल एखर बर अब दूरिहा जाना नइ परय।
स्वास्थ्य मंत्री ह कोरोना वायरस के प्रकोप अऊ ये संबंध म जारी एडवाइजरी ल धियान म रखत सबो छै जिला मन म ये सुविधा के शुभारंभ अपन निवास कार्यालय ले चुनिंदा विभागीय अधिकारी मन के मौजूदगी म वीडियो कॉन्फ्रेसिंग के माध्यम ले करिन। उद्घाटन के समय सबो जिला अस्पताल मन म घलोक कमती मनखे मौजूद रहिन। ‘जीवन धारा’ कार्यक्रम के तहत दुर्ग, कांकेर, कोरबा अऊ जशपुर जिला चिकित्साल मन म पांच-पांच यूनिट, बिलासपुर म चार अउ महासमुंद म तीन डायलिसिस यूनिट के स्थापना करे गए हे। कार्यक्रम के अंतर्गत फेयरफैक्स इंडिया चैरिटेबल फाउंडेशन (ट्रस्ट), मुंबई कोति ले छत्तीसगढ़ म कुल 30 डायलिसिस मशीन निःशुल्क उपलब्ध कराए गए हे।
डायलिसिस सुविधा के लोकार्पण करत स्वास्थ्य मंत्री श्री टी.एस. सिंहदेव ह कहिन कि किडनी रोग ले ग्रस्त मरीज मन ल लंबा समय तक घेरी-बेरी डायलिसिस कराना परथे। एखर से उमन ल बड़का आर्थिक बोझ परथे। डायलिसिस के सुविधा राज्य म कुछेक शहर मन म हे। मनखे मन के समस्या मन ल ध्यान म रखत राष्ट्रीय स्वास्थ्य मिशन के अंतर्गत छै जिला चिकित्सालय मन म ये निःशुल्क सुविधा शुरू करे जात हे। एखर से ओ मन ल अपन क्षेत्र म ही जल्दी इलाज मिलही। अवइया समय म सबो जिला अस्पताल मन म डायलिसिस के सुविधा शुरू करे जाही।
श्री सिंहदेव ह वीडियो कॉन्फ्रेसिंग के संग चार जिला अस्पताल मन म डायलिसिस मशीन अउ आन व्यवस्था मन के घलोक अवलोकन करिन। ‘जीवन धारा’ कार्यक्रम के अंतर्गत डायलिसिस मशीन मन के संचालन बर केन्द्रीय स्वास्थ्य मंत्रालय के हुकुम के मुताबिक निविदा के माध्यम ले एसकैग (ESKAG) संजीवनी प्राइवेट लिमिटेड, कोलकाता के चयन करे गए हे। वीडियो कॉन्फ्रेसिंग म स्वास्थ्य विभाग के सचिव श्रीमती निहारिका बारिक सिंह, विशेष सचिव डॉ. से.आर. प्रसन्ना, संचालक स्वास्थ्य सेवाएं श्री नीरज बंसोड़ अऊ राष्ट्रीय स्वास्थ्य मिशन के संचालक डॉ. प्रियंका शुक्ला घलोक मौजूद रहिन।
