- स्वास्थ्य मंत्री ह वॉलिटिंयर्स के सेवाभावना ल सहराईन
रायपुर, 31 मार्च 2020। छत्तीसगढ़ राज्य म कोरोना महामारी के रोकथाम बर शासन प्रशासन कोति ले करे जात उदीम मन म सहयोग करे खातिर राज्य के 4750 वॉलिटिंयर मन ह अपन आप सहयोग देहे के सहमति देहे हें। ए मन म चिकित्सक, नर्सिंग अउ पैरामेडिकल स्टॉफ, फार्मसिस्ट, फिजियोथेरेपिस्ट, आयुष के जानकार, समाजसेवी संस्था के मनखे अउ वाहन चालक सामिल हें।
कोरोना वायरस जनित बीमारी आज वैश्विक महामारी के रूप ले लेहे हे। एखर चलते पूरा विश्व के कई देश संग भारत म लॉकडाउन के स्थिति बने हे। राज्य शासन कोति ले छत्तीसगढ़ म ये महामारी के रोकथाम बर कई स्तर म प्रयास करे जात हे। ये महामारी ले प्रभावित मनखे मन के ईलाज अउ ओ मन ल राहत पहुंचाए के उद्देश्य ले बड़ संख्या म वॉलिटियर्स के जरूरत रहिस हे। स्वास्थ्य विभाग ह मनखे मन ले स्व-स्फूर्त रूप ले आगू आए अऊ अपन सहमति देहे के अपील करे रहिस। ये महामारी के फैलाव ल रोके म स्वैच्छिक रूप ले 4750 मनखे मन ह अपन सहमति स्वास्थ्य विभाग ल देहे हें। स्वास्थ्य मंत्री श्री टी.एस. सिंहदेव ह सबो वॉलिटियर्स के सेवाभावना के सराहना करत कहिन हे कि आप मन ह संकट के ये घड़ी म स्व-स्फूर्त रूप ले सहयोग देहे के सहमति देके हम सबके मनोबल बढ़ाए हव।
हम आप ल बता देवन के स्वास्थ्य विभाग ह चिकित्सकीय विशेषज्ञ, चिकित्सक, आयुष, पैरामेडिकल स्टॉफ, चिकित्सा क्षेत्र ले जुड़े परामर्शदाता, स्वयं सेवी संगठन या गैर चिकित्सकीय क्षेत्र ले जुड़े कार्यकर्ता मन ले स्वैच्छिक रूप ले सहायता के अपील करे रहिस अऊ मोबाइल नम्बर 96910-90000 अउ 79873-67089 ल सार्वजनिक रूप ले जारी करे रहिस। विभाग के ये अपील ल देखत छत्तीसगढ़ राज्य म कई ठन सामाजिक संगठन अउ ट्रस्ट ले जुड़े 801 मनखे मन ह, 200 आयुष चिकित्सक मन ह, 224 मेडिकल चिकित्सक मन ह, 360 नर्स मन ह, 234 पैरामेडिकल मन ह, फर्मास्यिूटिकल क्षेत्र ले जुड़े 206 मनखे मन ह, 17 फिजियोथेरेपिस्ट मन ह, 1167 व्यवासायी मन अउ स्व-रोजगार मन ह अऊ तकनीकी अउ नॉन तकनीकी क्षेत्र ले जुड़े 500 वॉलिटियर्स मन ह ये महामारी के रोकथाम बर स्वैच्छिक रूप ले सहयोग के सहमति देहे हें।