स्वास्थ्य मंत्री श्री जायसवाल के हुकुम, लापरवाही करइया मन उपर होही सख्त कार्रवाई

रायपुर, 10 जून, 2024। सरगुजा जिला के विकासखण्ड अंबिकापुर अंतर्गत प्राथमिक स्वास्थ्य केन्द्र नवानगर म प्रसूता के जमीन म प्रसव के घटना संज्ञान म आतेच स्वास्थ्य मंत्री श्री श्याम बिहारी जायसवाल ह घटना के जांच के निर्देश देहे रहिन। मामला ल लेके स्वास्थ्य विभाग कोति ले जांच करवाए गए हे।
जांच के समय बीएमओ, संस्था प्रभारी, बीपीएम, स्टॉफ नर्स, एएनएम अउ स्थानीय मितानिन उपस्थित रहिन । जांच के तहत सबो के आगू ओ प्रकरण के बारे म बयान ले गीस, अउ जच्चा-बच्चा प्रसूता महिला अउ नवजात लइका मन ल देखे गीस। प्रसव ल लेके प्रोटोकॉल के पालन नइ करइया खण्ड चिकित्सा अधिकारी डॉ पी.एन. राजवाड़े ल तुरंत प्रभाव ले निलंबित करे गीस। रात्रिकालिन स्टॉफ दूसरी एएनएम श्रीमती मीना चौहान ल तुरंत प्रभाव ले हटाके आयुष्मान मंदिर रेवापुर म कार्यादेशित करे गीस। डयूटी म पदस्थ स्टॉफ नर्स बिना पूर्व सूचना के स्टॉफ नर्स कन्या पैंकरा काम म अनुपस्थित रहिस ते ल तुरंत प्रभाव ले निलंबित कर दे गीस, निलंबन अवधि म संबंधित के मुख्यालय शहरी प्राथमिक स्वास्थ्य केन्द्र नवापारा करे गीस। निलबंन अवधि म संबंधित ल जीवन निर्वाह भत्ता के पात्रता होही।
स्वास्थ्य मंत्री श्री जायसवाल ह विभाग के अधिकारी मन ल निर्देश जारी करे हे के भविष्य म अइसन गंभीर लापरवाही करइया उपर सख्त कार्रवाई करे जाय अऊ मरीज मन के मानवीय पहलु मन के विशेष ध्यान रखे जाय।