एम्स अऊ स्वास्थ्य विभाग के अधिकारी मन ले वीडियो कॉन्फ्रेसिंग करके प्रदेश म व्यवस्था के करिन समीक्षा
रायपुर, 29 मार्च 2020। स्वास्थ्य मंत्री श्री टी.एस. सिंहदेव ह आज भारत म दक्षिण कोरिया के राजदूत श्री शिन बॉग-किल ले फोन म चर्चा करके दक्षिण कोरिया कोति ले कोविड-19 के सफल नियंत्रण के रणनीति के जानकारी लीन। उमन श्री किल ले उहां कोविड-19 के संक्रमण ल रोके अऊ पीड़ित मन के इलाज बर करे गए उपाय मन के संग अस्पताल मन म करे गए व्यवस्था के घलोक जानकारी लीन। श्री सिंहदेव ह ओ मन ल ये बीमारी उपर नियंत्रण बर छत्तीसगढ़ म उठाए जात कदम मन के बारे म बताइन। श्री किल ह इहां सरकार कोति ले करे जात काम मन ल सही दिशा म जात कदम बताइस। हम आप मन ल बता देवन के दक्षिण कोरिया कोविड-19 के सबले बेहतर प्रबंधन अउ नियंत्रण म सफलता पवइया अगुवा देश ये।
स्वास्थ्य मंत्री ह एम्स रायपुर के निदेशक डॉ. नितिन नागरकर ले वीडियो कॉन्फ्रेसिंग ले चर्चा करके उहां कोरोना वायरस संक्रमित मन के इलाज बर करे गए व्यवस्था के जानकारी तको लीन। डॉ. नागरकर ह बताइस के एम्स म 200 मनखे मन के इलाज बर अलग से विशेष यूनिट तियार करे जात हे। श्री सिंहदेव ह उहां उपचार करावत कोरोना पाजिटिव्ह पाए गए मरीज मन के स्वास्थ्य के बारे म घलोक जानकारी लीन।
स्वास्थ्य मंत्री श्री सिंहदेव ह स्वास्थ्य सचिव श्रीमती निहारिका बारिक सिंह, संचालक स्वास्थ्य सेवाएं श्री नीरज बंसोड़ अऊ राष्ट्रीय स्वास्थ्य मिशन के संचालक डॉ. प्रियंका शुक्ला ले घलोक वीडियो कॉन्फ्रेसिंग के संग चर्चा करके प्रदेश म युद्ध स्तर म कोविड-19 ले निपटे के तैयारी मन के समीक्षा करिन। उमन मेडिकल स्टॉफ बर मुहैया कराए जात मास्क अउ व्यक्तिगत सुरक्षात्मक उपकरण मन के आपूर्ति अऊ अस्पताल मन म वेंटीलेटर्स के बारे म घलोक जानकारी लीन। उमन स्कूल अऊ छात्रावास मन के साफ-सफाई करवाके आपात स्थिति ले निपटे के दिशा म घलोक तैयारी करे के निर्देश दीन। श्री सिंहदेव ह स्वास्थ्य विशेषज्ञ डॉ. योगेश जैन ले घलोक प्रदेश म कोविड-19 के नियंत्रण अउ रोकथाम के संबंध म चर्चा करिन।
