रायपुर, 21सितंबर 2020। छत्तीसगढ़ म एक बार फेर मौसम के मिजाज बदल गेहे। बंगाल के खाड़ी म सिस्टम बने हुए हे। जेखर असर बस्तर समेत पूरा छत्तीसगढ़ म देखे बर मिलत हे। आज राजधानी रायपुर म बिहनिया ले ही बारिश होइस। आसमान म दिनभर बादल छाय रिहिस हे। एखर ले लोगन मन राहत महसूस करिस हे। उहें मौसम विभाग ह अवइया 24 घंटा बर रायपुर, दुर्ग अउ बस्तर म भारी बारिश के चेतावनी दे हे।
मौसम वैज्ञानिक एचपी चंद्रा ह बतइस कि उत्तर पश्चिम बंगाल के खाड़ी म एक निम्न दाब के क्षेत्र बने हे। संग म ही चक्रीय चक्रवाती घेरा के असर देखे बर मिलही। एखर असर दक्षिण क्षेत्र म घलो देखे बर मिलही।
अवइया 24 घंटा म प्रदेश के अधिकांश इलाका म मध्यम ले भारी वर्षा होही। कई इलाका म गरज चमक के संग छींटा पड़े के घलो संभावना हे। एखर संग म आकाशीय बिजली गिरे के घलो संभावना जताय जावत हे। प्रदेश म दुर्ग, रायपुर अउ बस्तर संभाग म भारी वर्षा हो सकत हे।
