मुख्यमंत्री श्री विष्णुदेव साय ह हेलमेट जागरूकता रैली अऊ अंजोर रथ ल बगिया निवास ले करिन रवाना

रायपुर, 16 जनवरी 2024। मुख्यमंत्री श्री विष्णुदेव साय ह जशपुर जिला के अपन गृहग्राम बगिया के निवास स्थल ले सड़क सुरक्षा हेलमेट जागरूकता रैली अऊ अंजोर रथ ल रवाना करिन। ये मौका म मुख्यमंत्री श्री विष्णुदेव साय ह सबो ले यातायात नियम मन के पालन करे के अपील करिन। उमन कहिन कि दुपहिया चलात समय हेलमेट जरूर पहिरयं, चार पहिया म सीट बेल्ट जरूर लगायं। नशा म गाड़ी झन चलावयं। सड़क म लापरवाही ले झन चलयं। एक छोट कन चूक ले कई जिंदगी दांव म लग जाथे। जेखर सेती जिम्मेदारी पूर्वक नियम मन के पालन करव। ये मौका म विधायक पत्थलगांव श्रीमती गोमती साय, आईजी श्री अंकित गर्ग, सीसीएफ श्री नवीद सजाउद्दीन, कलेक्टर डॉ रवि मित्तल, एसपी श्री डी रविशंकर संग आन जनप्रतिनिधि अउ वरिष्ठ अधिकारी उपस्थित रहिन।
34 वां राष्ट्रीय सड़क सुरक्षा महिना 2024 के तहत जशपुर जिला पुलिस विभाग कोति ले ये रैली निकाले गीस। जेन मनखे मन ल यातायात नियम मन के उल्लंघन ले होवइया दुष्परिणाम मन के बारे म जागरूक करत नियम मन के पालन बर प्रेरित करही। नवा अंजोर रथ म वीडियो फिलिम के माध्यम ले सड़क सुरक्षा अऊ साइबर सिक्योरिटी के सावधानी के प्रति आम जन ल जागरूक करे जाही। ये रथ अगले महिना तक पूरा जिला के भ्रमण करही।