मुंगेली, 24 फरवरी 2020। भटगांव के बिसाहू साहू के खेत म पुलिस बल के जवान जब चना के खेत म धमकिन त गांव वाले मन ल अकचका गइन। पुलिस के जवान मन चना के बीच म लगे कईयोन ठन गांजा के पेंड ल जब उखान के अपन साहेब तिर लाईन त गांव वाले मन ल पता चलिस के आरोपी ह चना के आड़ म गांजा के खेती करथे।
कोतवाली थाना के पुलिस के बताती आरोपी बिसाहू साहू अड़बड़ समें ले अपन खेत म गांजा के पेंड लगावत रहिस। पुलिस ल मुखबिर ह जब ये बात बताइस त पुलिस ह ये कार्यवाही करिस। ये मा पुलिस ल आरोपी बिसाहू साहू के खेत ले 85 नग गांजा के पेड़ मिलिस जेला जब्त करे गीस। आरोपी ल घलोक पकड़ के कोतवाली लाए गए हे।
ये मामला सिटी कोतवाली थाना मुगेली के भटगांव के ये। खबर हे के भटगांव के बिसाहू साहू खुदे गांजा पीथे। पीए के संगें संग वो ह गांजा के खेती तको करथे। बताथें के वो अड़बड़ समें ले गांजा के अवैध कारोबार घलोक करत रहिस। जिला के एसपी सीडी टण्डन के मार्गदर्शन अउ निर्देशन म टीआई आशीष अरोरा ह प्लान बनाके भटगांव गांव म दबिश दीस। जेमां आरोपी बिसाहू साहू के खेत ले गांजा पकड़े गीस।
