गांजा तस्करी करत पति-पत्नी गिरफ्तार, नाकाबंदी करके पुलिस ह पकड़िस

महासमुन्द, 29 जनवरी 2021। जिला म एक्टिवा वाहन म गांजा तस्करी करइया दंपति ल बागबाहरा पुलिस ह गिरफ्तार करिस हे। पुलिस अधीक्षक प्रफुल्ल कुमार ठाकुर अऊ अतिरिक्त पुलिस अधीक्षक मेघा टेम्भूरकर ह जिला के सबो थाना प्रभारी मन ल अवैध गांजा के परिवहन अऊ बिक्री के संबंध म कार्यवाही करे के निर्देशित करे हे। इही कड़ी म थाना बागबाहरा ल गुरूवार के मुखबिर ले सूचना मिलिस कि एक सफेद रंग के दूपहिया वाहन म दू लोगन ओडिसा ले महासमुन्द डाहर अवैध रूप ले गांजा परिवहन करत आवत हे। पुलिस ह पिथौरा चौक बागबाहरा पहुंच के ओडिसा के डाहर ले एक सफेद रंग के दूपहिया वाहन ल रोकिस। ओमा सवार पुरूष अऊ महिला ले पूछताछ करिन। युवक ह अपन नाम सुनिल निषाद उम्र 25 बछर अऊ महिला नम्रता निषाद उम्र 27 बछर निवासी न्यू शांति नगर रायपुर बतइस। इंखर कब्जा ले एक बैग म 11 किलो अवैध मादक पदार्थ गांजा कीमत एक लाख 10 हजार जब्त करिन। आरोपी मन के विरूद्ध अपराध धारा 20(ख) एनडीपीएस एक्ट कार्रवाई करके न्यायिक रिमाण्ड म न्यायालय म पेश करे गए हे।