मूल हिन्दी – जी.एस. केशरवानी, उपसंचालक, डीपीआर, रायपुर
अनुवाद – गुरतुरगोठ
होली के तिहार ह रंग के उमंग अउ खुसी के संदेस लेके आथे। ए पईत छत्तीसगढ़ के बिहान दीदी मन प्राकृतिक रंग ले न केवल होली ल सुरक्षित बनावत हें, बल्कि अपन जिनगी म खुसहाली के नवा रंग घलो भरत हें।
छत्तीसगढ़ राज्य ग्रामीण आजीविका मिशन (बिहान) ले जुड़े महिला मन आत्मनिर्भर बनके स्वसहायता समूह के माध्यम ले हर्बल गुलाल तइयार करत हें। प्राकृतिक फूल अउ भाजीपाला ले बने ए रंग मन पूरा तरीका ले सुरक्षित अउ पर्यावरण बर बने हें। सुगन्ध बर गुलाबजल अउ प्राकृतिक इत्तर के परयोग करे जात हे, जेखर ले रंग के महक घलो मन ल भावत हे।
कांकेर जिला म आत्मसमर्पित माओवादी मन के समूह ह घलो पुनर्वास नीति के तहत हर्बल गुलाल बनाय के काम सुरू करे हें। पुनर्वास शिविर म मानकी नेताम, सामको नुरूटी अउ डाली सलाम जइसे सदस्य मन उछाह के संग गुलाल तइयार करत हें। उमन के कहना हे के ए काम ह उमन ल आत्मसम्मान अउ पक्का आजीविका दुनों देवत हे। सासन के पुनर्वास नीति ले भटके जवान मन ल मुख्यधारा ले जोड़े के रद्दा म ए ह एक बड़का पहल आय।
प्रदेश के रायपुर, कबीरधाम, गरियाबंद, जांजगीरचांपा, नारायणपुर अउ कांकेर संग अउ कतको जिला मन म स्वसहायता समूह हर्बल गुलाल के उत्पादन करत हें। कतको समूह ह मंदिर मन म चढ़ाय फूल मन ल बटोर के सुगंधित गुलाल बनावत हें। अबुझमाड़ जइसे आदिवासी इलाका मन म महिला मन ह एला अपन पहिचान बना ले हें। बिहान योजना के तहत महिला मन सरस मेला अउ क्षेत्रीय मेला मन म स्टॉल लगाके सामान मन ल बेचत हें। एखर ले उमन ल 40 ले 60 हजार रूपया तक के सीधा लाभ मिलत हे। कतको महिला मन ‘लखपति दीदी’ बनके आत्मनिर्भरता के नवा मिसाल बनावत हें।
हर्बल गुलाल के कतको फायदा हें। ए ह चमड़ी अउ आंखी बर सुरक्षित हे, एमां एलर्जी या जलन के डर नइ रहय। ए ह पर्यावरण ल घलो नुकसान नइ पहुँचावय। हरदी म एंटीबैक्टीरियल गुन अउ पलाश म लहू ल सफा करे के गुन (रक्तशोधक विशेषता) होथे, जे ह एला अउ उपयोगी बनाथे। बजार म एखर कीमत 80 ले 250 रूपया किलो तक हे, जेखर ले ए ह आम मनखे बर घलो सुलभ हे।
जानबा हे के छत्तीसगढ़ सरकार बछर 2026 ल ‘महिला गौरव वर्ष’ के रूप म मनात हे। राज्य सरकार के उदीम ले 5 लाख महिला मन लखपति दीदी बन गे हें। महिला मन ल आर्थिक मजबूती देहे बर चलत ‘महतारी वंदन योजना’ ले लगभग 69 लाख ले जादा महिला मन ल हर महीना एक-एक हजार रूपया के रासि घलो देहे जात हे। ए बछर के बजट म लखपति दीदी मन ल आन जगह घुमाय (एक्सपोजर विजिट) बर नवा योजना घलो लाय गे हे। महिला सशक्तिकरण के ए उदीम ह विकसित छत्तीसगढ़ के संकल्प ल पूरा करे म बड़ भूमिका निभाही।
