होली म ब्रांडेड गुलाल ल टक्कर देही गांव के महिला मन, स्वावलंबन के दिशा म बढ़ावत हें कदम

महासमुंद, ये पईत होली म बिहान समूह ले जुड़े महिला मन हर्बल गुलाल तियार करत हें। स्व सहायता समूह के स्वरोजगार ले जुड़े महिला मन दिन-रात हर्बल गुलाल तियार करे म भिड़े हें। ये गुलाल ल लगाय ले कोनो साइड इफेक्ट नइ होवय। महिला स्व-सहायता समूह के जेन हर्बल गुलाल अऊ हर्बल रंग तियार करत हें तेकर कई विशेषता हे। ये मां फूल मन के रंग के उपयोग करे गए हे। गुलाल अऊ रंग म फूल के ही सुगंध के उपयोग करे जात हे। ये मां कोनो प्रकार के केमिकल नइ मिलाए जात हे, जेन नुकसान करय। एकरे सेती ये गुलाल अऊ रंग के डिमांड ज़िला के संग आसपास के ज़िला म ले घलोक आवत हे। एकरे संग महिला मन ल घर बइठे स्वरोजगार घलोक मिलत हे। महासमुन्द विकासखण्ड के ग्राम पंचायत बिरकोनी के माया महिला स्व सहायता समूह ह पउर साल जइसे ये साल घलोक होली बर जड़ी, बुटी अऊ फूल ले हर्बल गुलाल बनाए के काम करत हे।
माया समूह के महिला मन ह बताइन के गुलाबी रंग के संग म पीला, संतरा, लाल अऊ चंदन रंग के गुलाल तको बनाए जात रहा हे। जेला स्व-सहायता समूह के महिला मन गौठान परिसर बिरकोनी के दुकान के माध्यम ले करत हें। जंगल म जाके टेसू फूल चुनके ओखर घलोक हर्बल गुलाल बनाय गए हे। फेर ओखर मात्रा कम हे। माया ह बताइस कि हर्बल गुलाल के ऑर्डर स्व-सहायता समूह के मोबाईल नम्बर 93400-00982 म कॉल करके घलोक देहे जा सकत हे। हर्बल गुलाल बनाए म हल्दी, ईत्र, पलास के फूल अउ खाए के चुना आदि के उपयोग करे गए हे। 100 ग्राम हर्बल गुलाल के क़ीमत मात्र 10 रुपिया हे। अभी हाल म समूह ह करीबन 7 किलोग्राम गुलाल बना डरे हे अऊ हर्बल गुलाल बनाए के काम सरलग चलत हे।