मुख्यमंत्री श्री बघेल ले आस्ट्रेलिया के हाईकमिश्नर श्री बैरी ओ फरेल ह मुलाकात करिस

रायपुर, 03 सितंबर 2021। मुख्यमंत्री श्री भूपेश बघेल ले काली संझा ऊंखर निवास कार्यालय म आस्‍ट्रेलिया के हाई कमिश्नर श्री बैरी ओ फारेल ह मुलाकात करिस। उमन मुख्यमंत्री के संग आस्ट्रेलिया अऊ छत्तीसगढ़ के बीच सामाजिक सांस्कृतिक क्षेत्र म आपसी सहयोग अऊ पूंजी निवेश विशेष रूप ले माइनिंग अऊ पर्यावरण संरक्षण के संभावना मन उपर विस्तार ले विचार विमर्श करिन। ये बेरा म उद्योग मंत्री श्री कवासी लखमा विशेष रूप ले उपस्थित रहिन।
हाई कमिश्नर श्री फारेल ह मुख्यमंत्री श्री भूपेश बघेल के नेतृत्व म राज्य के पूरा विकास, आदिवासी समुदाय के उत्थान अऊ सामाजिक संकेतक मन म सुधार बर लागू करे गए राज्य सरकार के योजना मन उपर गहरी रूचि लीन। उमन छत्तीसगढ़ म कोरोना संक्रमण के रोकथाम बर सरकार कोति ले करे गए प्रदास मन के घलोक सराहना करिन। हाईकमिश्नर ह विकास के कई क्षेत्र मन म द्विपक्षीय संबंध ल बढ़ावा देहे के इच्छा जताये हें। उमन कहिन कि आस्ट्रेलिया के माइनिंग के क्षेत्र म विशेषज्ञता हे। उमन माइनिंग सर्वे, अन्वेषण-खनन तकनीक आदि क्षेत्र मन म आपसी सहभागिता के बात कहिन।
मुख्यमंत्री श्री भूपेश बघेल ह कहिन कि छत्तीसगढ़ खनिज अउ वन सम्पदा ले भरपूर राज्य हे। राज्य म कई प्रकार के संसाधन उपलब्‍ध हे। उमन आस्ट्रेलिया के संग सामाजिक सांस्कृतिक सहभागिता अऊ उहां के उद्यमी मन कोति ले छत्तीसगढ़ म औद्योगिक पूंजी निवेश के इच्छा उपर प्रसन्नता जताये हें अऊ कहिन कि राज्य सरकार एखर बर हरसंभव सहयोग प्रदान करही। मुख्यमंत्री ह छत्तीसगढ़ म जैविक खेती अऊ वनोंपज के वेल्यूएडिशन ल बढ़ावा देहे बर सरकार कोति ले करे जात प्रयास मन के जानकारी दीन।
ये मौका म मुख्यमंत्री के अपर मुख्य सचिव श्री सुब्रत साहू ह छत्तीसगढ़ राज्य के सामाजिक-भौगोलिक स्थिति अउ कई क्षेत्र मन म होवत प्रगति के जानकारी दीन। ये बेरा म प्रमुख सचिव उद्योग श्री मनोज पिंगुआ, मुख्यमंत्री के सचिव श्री सिद्धार्थ कोमल परदेशी, संचालक उद्योग श्री अनिल टुटेजा, प्रबंध संचालक छत्तीसगढ़ राज्य औद्योगिक विकास निगम श्री पी. अरूण प्रसाद, प्रबंध संचालक लघु वनोपज संघ श्री संजय शुक्ला, कांसुल जनरल सुश्री रॉन एनसवर्थ, हाईकमीशन के सेक्रेटरी सुश्री एमी कियोफ, बिजनेस डेवलेपमेंट मेनेजर श्री पार्थासेन अउ आन अधिकारी उपस्थित रहिन।
छत्तीसगढ़ के दू दिन प्रवास म आए आस्ट्रेलिया के हाई कमिश्नर श्री फरेल राज्य के औद्योगिक संगठन के पदाधिकारी अऊ वरिष्ठ अधिकारी मन ले घलोक मुलाकात करके माइनिंग अउर पर्यावरण, बायोफ्यूल, टेक्नालाजी, रिसर्च, फूड प्रोसेसिंग, अक्षय उर्जा के क्षेत्र मन म आस्ट्रेलिया के सहभागिता अउ उहां के उद्यमी मन के पूंजी निवेश के संभावना मन उपर विस्तार ले चर्चा करहीं।