बैगा समुदाय के महिला मन घलोक होवत हे अभियान ले लाभान्वित
मुंगेली, छत्तीसगढ़ सरकार कोति ले संचालित “स्वस्थ नारी, सशक्त परिवार अभियान” ह दूरस्थ वनांचल मन तक स्वास्थ्य सेवा पहुँचाए के नवा इतिहास रच देहे हे। मुंगेली जिला के लोरमी विकासखंड के प्रधानमंत्री जनजाति आदिवासी न्याय महाअभियान (पीएम-जनमन) क्षेत्र म पंजीकृत सबो 87 गर्भवती महिला मन के गुणवत्तापूर्ण प्रसव पहिली जांच (ए.एन.सी.) सफलतापूर्वक पूरा करे गीस।
अभियान के अंतर्गत 15 जादा जोखिम गर्भवती महिला मन के पहिचान करे गीस, जे मन ल लोरमी मातृ अऊ शिशु अस्पताल म विशेषज्ञ चिकित्सक मन कोति ले सोनोग्राफी के संग विशेष जांच उपलब्ध कराए गीस।
पीवीटीजी समुदाय म सुरक्षित मातृत्व के संबल
जहां कभू बैगा समुदाय के महिला मन प्रसव के समय स्वास्थ्य सुविधा ले वंचित रहि जात रहिन, उहें अब ए.एन.सी. जांच, पोषण परामर्श अऊ संस्थागत प्रसव के तैयारी ह ऊंखर जीवन म सुरक्षित मातृत्व के नवा आशा जगाए हे।
राज्य सरकार के 102 महतारी एक्सप्रेस अऊ मोबाइल मेडिकल यूनिट के सेवा ह पहाड़ अऊ घना जंगल के बीच रहइया बैगा समुदाय के महिला मन बर स्वास्थ्य सुविधा मन के पहुँच ल सहज बनाए हे। मितानिन अऊ ए.एन.एम. के सरलग भूमिका ह ए महिला मन ल स्वास्थ्य सेवा ले जोड़े रखे म महत्वपूर्ण योगदान देहे हे।
अभियान के समय केवल चिकित्सा सेवा भर नइ दे गीस, भलुक महिला मन अऊ किशोरी मन म जागरूकता के प्रसार घलोक करे गीस। ओ मन ल मासिक धर्म स्वच्छता, साप्ताहिक आयरन-फोलिक एसिड सेवन अऊ संतुलित आहार के परामर्श दे गीस। एखर संगेच सिकल सेल, टीबी, ब्लड प्रेशर, शुगर, सर्वाइकल अऊ स्तन कैंसर के प्रारंभिक जांच घलोक करे गीस।
जानबा हे के छत्तीसगढ़ म “स्वस्थ नारी, सशक्त परिवार अभियान” के अंतर्गत प्रधानमंत्री सुरक्षित मातृत्व अभियान (PMSMA) ल 24 ले 26 सितंबर तक विशेष रूप ले संचालित करे गीस। ए अवधि म प्रदेश के 843 शासकीय स्वास्थ्य संस्थान मन के माध्यम ले 51 हज़ार ले जादा गर्भवती महिला मन के जांच करे गीस। एमां ले 10 हज़ार ले जादा जादा जोखिम गर्भावस्था (High-Risk Pregnancy) के मामला मन के पहिचान करके ओ मन ल समय म विशेषज्ञ परामर्श अऊ उपचार उपलब्ध कराए गीस। संगेच, 8,619 महिला मन के अल्ट्रासोनोग्राफी घलोक करे गीस, जेखर से मातृ स्वास्थ्य सेवा म सटीकता अऊ भरोसा अऊ मज़बूती मिलीस।