छत्तीसगढ़ हाईकोर्ट ले गए जस्टिस सप्रे के उदीम
नई दिल्ली, सुप्रीम कोर्ट ह पहली पइत हिंदी म निर्णय उपलब्ध कराए हे, छत्तीसगढ़ हाईकोर्ट ले गए जस्टिस अभय मनोहर सप्रे ह बुधवार के दिन येला जारी करे हे। दरअसल, सुप्रीम कोर्ट ह बुधवार ले ही अंगरेजी संग देश के आन भाषा मन म निर्णय उपलब्ध कराए के शुरुआत करे हे।
सुप्रीम कोर्ट म घलोक अब हिंदी म निर्णय उपलब्ध कराए के शुरुआत हो गए हे। काली बुधवार के दिन जस्टिस अभय मनोहर सप्रे के सिंगल बेंच ह दिल्ली हाईकोर्ट के आदेश के खिलाफ सुप्रीम कोर्ट म पेस विशेष अनुमति याचिका म ये निर्णय दीस। बेटा के मध्यप्रदेश हाईकोर्ट म प्रैक्टिस शुरू करे के सेती खुद तबादला लेके छत्तीसगढ़ हाईकोर्ट आए जस्टिस अभय मनोहर सप्रे अपरेल 2012 ले लेके मार्च 2013 तक इहां पदस्थ रहिन।
हम आप ल बता देवन के अब तक सुप्रीम कोर्ट के निर्णय अंगरेजी म ही होत रहिस, ये सेती पक्षकार मन ल बड़ परेशानी उठाए ल परत रहिस। माने जात हे कि सुप्रीम कोर्ट म अंगरेजी के बाध्यता के सेती ही देश के हाईकोर्ट मन घलोक अंगरेजी म ही आदेश अऊ निर्णय पारित करत रहिन हें। बुधवार के दिन हिंदी के संगेच असमी, कन्नड़, मराठी, ओड़िया अऊ तेलुगु भाषा मन म घलोक आदेश अऊ फैसला उपलब्ध हो गए हे।
हाईकोर्ट म जस्टिस यतींद्र सिंह ह करे रहिस शुरुआत
छत्तीसगढ़ हाईकोर्ट के वो समें के चीफ जस्टिस यतींद्र सिंह ह हिंदी म आदेश जारी करे के शुरुआत करे रहिन। ओ मन अपन बेंच के पहिली आदेश हिंदी म ही जारी करत रहिन, ऊंखर रिटायरमेंट के बाद ये परंपरा बंद हो गीस। सुप्रीम कोर्ट ले हिंदी संग आन भाषा मन म निर्णय उपलब्ध कराए के शुरुआत के बाद उम्मीद हे कि अब हाईकोर्ट के फैसला घलोक हिंदी म उपलब्ध हो सकही।
