हिरदे के मरीज मोनिक ल मिलीस सहारा : महतारी बेटी जताइन मुख्यमंत्री के आभार

रइपुर 19 जून 2021 शनिच्चर। कांकेर जिला के लोकार्पण-भूमिपूजन कार्यक्रम के बेरा जिला के ग्राम ढेकुना रहइया मोनिका जैन कांकेर म स्वामी आत्मानंद अंग्रेजी माध्यम स्कूल प्रारम्भ करे बर मुख्यमंत्री के प्रति आभार प्रकट करीन । उन्मन मुख्यमंत्री ल बताइन कि वोह सिंगल पेरेंट हे अउ हिरदे के बीमारी ले तको पीडि़त हे। तेकरे पाय के अपन बेटी पल्लवी जैन के पढ़ई अउ ओग्गर भविष्य ल लेके हमेशा चिंतित रहय।
फेर मुख्यमंत्री दाउ भूपेश बघेल द्वारा लइकामन के बने भविष्य ल धियान रखके कांकेर जिला म तको खोले गे स्वामी आत्मानन्द अंग्रेजी माध्यम स्कूल म उन्कर बच्ची के प्रवेश ले उन ल सहारे भर नई मिलीस भलकुन ओकर गुणवत्तापूर्ण शिक्षा ल लेके उन्कर चिंता दूर हो गे हे। मोनिका जैन ह वैश्विक महामारी कोरोना काल म तको लइका मन के शिक्षा ल प्राथमिकता देवत स्वामी आत्मानंद अंग्रेजी माध्यम स्कूल प्रारम्भ करे बर मुख्यमंत्री ल विशेष रूप ले धन्यवाद दीन।
कार्यक्रम के बेरा कुमारी पल्लवी जैन ह फर्राटा अंग्रेजी म मुख्यमंत्री संग गोठियावत बताइन कि वोह स्वामी आत्मानंद अंग्रेजी माध्यम स्कूल कांकेर म सातवीं कक्षा के विद्यार्थी हरे। स्कूल म लइकामन ल स्मार्ट क्लास, आर्ट एंड क्राफ्ट, खेल-कूद के संगे संग बने शिक्षा के जम्मो सुविधा मिलत हावय । जम्मो लइका ल फोकट म शिक्षा अउ ड्रेस आदि उपलब्ध होवत हावय । मुख्यमंत्री ह कुमारी पल्लवी जैन ल बधाई अउ शुभकामना देवत ओकर ओग्गर भविष्य के कामना करीन। मुख्यमंत्री कहीन कि वोह अइसनेहे आगू बाढ़त रहय अउ खूब तरक्की करै।