दुर्ग, 26 मई 2024। नगर निगम के ठेकेदार ल अपहरण करके बंद कमरा म लोहा के रॉड ले पिटाई करइया हिस्ट्रीशीटर पिंकी राय अउ ओखर संगी ल एसीसीयू अऊ नेवई पुलिस ह घेराबंदी करके गिरफ्तार करे हे। आरोपी वारदात के बाद किराया म रिसोर्ट बुक करके लुकाए रहिस। उहें तीसर आरोपी के पुलिस तलाश करत हे। पुलिस कंट्रोल रुम म एसीसीयू के उप पुलिस अधीक्षक (अपराध) हेम प्रकाश नायक ह पत्रवार्ता म बताइस कि निगम के ठेकेदार विपिन कुमार सिरसाम (33 वर्ष) ह रिपोट करे रहिस के वो ह 23 मई के रात 10 बजे घर के आगू नगर निगम ले लगे तामेश दुकान तीर संगवारी पंचराम देवांगन, आकाश सिंह राजपूत, आशीष कुरें के संग बात करत खड़े रहिस। उही बेरा म एक नीला रंग के कार आके रूकीस, ओ म ले पिंकी राय उर्फ विजेन्द राय, शैलेष निर्मलकर, ओम चौधरी तीनों अपन हाथ म लोहा के रॉड लेके गाली गलौच अऊ जान ले मारने के धमकी देवत ओ मन ल बल पूर्वक गाड़ी म बइठाइन अउ स्टेशन मरोदा उमरपोटी रोड राय ट्रेडर्स दुकान के भितरी ले जाके बंद कर के फेर मारपीट करिन।
ओखर रिपोट म पुलिस मामला म धारा 294, 323, 342, 365, 506,34 के तहत अपराध दर्ज करके आरोपी मन के तलाश शुरू करिस। थाना प्रभारी नेवई आनंद शुक्ला के अगुवई म आरोपी मन ल पकड़े खातिर टीम गठित करे गीस। सूचना मिलीस के आरोपी पिंकी राय उर्फ विजेन्द्र राय (45 वर्ष) निवासी गणेश नगर रिसाली अउ आरोपी शैलेष निर्मलकर ( 28 वर्ष) निवासी नेवई बस्ती बालोद रिसोर्ट म लुकाए हे। सूचना म पुलिस ह दबिश देके दुनों ल पकडि़स। पूछताछ करे म उमन अपराध घटित करना स्वीकार करिन। घटना म बउरे कार अउ लोहा के राड दू नग जब्त करे गए हे। प्रकरण के एक आन फरार आरोपी ओम चौधरी के तलाश करे जात हे। जानबा हे के पुलिस रिकार्ड म आरोपी पिंकी राय नेवई के गुण्डा बदमाश हे, ओखर विरुद्ध थाना नेवई अउ जिला दुर्ग के कई ठन थाना म कई अपराध दर्ज हे।
