मुख्यमंत्री अऊ विधानसभा अध्यक्ष ह हॉकी मेन्स जूनियर वर्ल्ड कप ट्रॉफी 2025 के करिन भव्य अनावरण

रायपुर, मुख्यमंत्री श्री विष्णु देव साय अऊ विधानसभा अध्यक्ष डॉ. रमन सिंह ह विधानसभा परिसर ले प्रतिष्ठित एफआईएच जूनियर मेन्स हॉकी वर्ल्ड कप 2025 के ट्रॉफी के अनावरण करिन। कार्यक्रम म केंद्रीय राज्य मंत्री श्री तोखन साहू, प्रदेश के कैबिनेट मंत्री श्री केदार कश्यप अऊ उपमुख्यमंत्री अरुण साव घलोक मौजूद रहिन। जानबा हे के विश्व के प्रतिष्ठित एफआईएच जूनियर मेन्स हॉकी वर्ल्ड कप 2025 के चमचमाती ट्रॉफी पहली पइत भारत टूर के तहत आज छत्तीसगढ़ पहुंचीस अऊ विधानसभा परिसर म आयोजित गरिमामयी समारोह म एकर अनावरण करे गीस।
मुख्यमंत्री श्री साय ह ए बेरा म कहिन के भारत म एफआईएच जूनियर वर्ल्ड कप 2025 के आयोजन होना बहुत गरब के बात हे अऊ ए ट्रॉफी के छत्तीसगढ़ आगमन राज्य खातिर विशेष सम्मान के अवसर हे। उमन हॉकी इंडिया के प्रति आभार जतात कहिन के ट्रॉफी टूर देशभर म खेल के प्रति उछाह अऊ प्रेरणा ल बढ़ावा देहे के महत्वपूर्ण प्रयास हे।
उमन कहिन के केंद्रीय खेल मंत्री डॉ. मनसुख मंडाविया कोति ले ए अभियान के शुभारंभ देश म खेल भावना ल नवा ऊर्जा देहे वाला कदम हे।
जानबा हे के एफआईएच हॉकी जूनियर मेन्स वर्ल्ड कप 2025 के मेजबानी भारत पहली पइत करत हे। प्रतियोगिता 28 नवंबर ले 10 दिसंबर तक चलही अऊ तमिलनाडु के चेन्नई अउ मदुरै म आयोजित करे जाही।