चक दे इंडिया के नारा के संग मुख्यमंत्री श्री भूपेश बघेल ह उठाईन हाकी विश्वकप के ट्राफी

रायपुर, मुख्यमंत्री श्री भूपेश बघेल ह चक दे इंडिया के नारा के संग हाकी विश्व कप के ट्राफी उठाईन अऊ भारत ल विश्व विजेता बने बर शुभकामना दीन। हॉकी वर्ल्ड ट्रॉफी आज छत्तीसगढ़ पहुंचे हे। राजधानी रायपुर म मुख्यमंत्री श्री भूपेश बघेल ह ट्रॉफी के अनावरण करिन। हॉकी वर्ल्ड कप के ट्रॉफी ल हॉकी इंडिया नई दिल्ली कोति ले देश के कई राज्य मन म घुमाए जात हे। आखरी पड़ाव म ये छत्तीसगढ़ के राजधानी रायपुर पहुंचे हे। जानबा हे कि ओडिशा म 13 ले 29 जनवरी 2023 तक एफआईएच ओडिशा मेन्स वर्ल्ड कप आयोजित करे जात हे। ये प्रतियोगिता भुवनेश्वर अऊ राउरकेला म संपन्न होही।
हॉकी वर्ल्ड ट्रॉफी रायपुर पहुंचे म मुख्यमंत्री निवास कार्यालय म ये ट्रॉफी के स्वागत बर कार्यक्रम के आयोजन करे गीस। मुख्यमंत्री श्री भूपेश बघेल के मुख्य आतिथ्य अउ खेल अउ युवा कल्याण मंत्री श्री उमेश पटेल के अध्यक्षता म ये कार्यक्रम के आयोजन करे गीस। मुख्यमंत्री निवास म आयोजित मुख्य कार्यक्रम म मुख्यमंत्री श्री बघेल ह हॉकी वर्ल्ड ट्रॉफी के अनावरण करिन। ये बेरा म हाकी म विशेष योगदान देवइया छत्तीसगढ़ के अंतर्राष्ट्रीय खिलाड़ी मन ल मुख्यमंत्री ह सम्मानित करिस।