बलौदाबाजार। जिला के लवन थाना इलाका के ग्राम पैंजनी म होली के रंग वो बेरा फीका पड़गे, जब डीजे नई बजाए म दो पक्ष मन के बीच जमके मारपीट होइस। ये मारपीट इतना बढ़गे कि लाठी अउ डंडा तक चलगे. कोनो के सर फूटिस, त कोनो के हाथ-गोड़ टूट गए हे. ये हमला म 22 लोग मन लहूलुहान होगे हे, जबकि 7 लोग मन गंभीर रूप ले घायल हे.
हमला म घायल लोगन मन के कहना हे कि गांव के सरंपच ह होली के तिहार म डीजे लगवाये रहिस. डीजे वाला ले 2 बजे तक डीजे बजाए के बात होय रहिस, लेकिन 12 बजे ही डीजे बंद कर दिस वोखर बाद विवाद होगे. इही बीच एक महिला ह एक लड़का ल चप्पल ले मार दिस, वोखर बाद वो लड़का घलो महिला के संग मारपीट कर दिस. एखरे चलत दो गुट के लोग मन इकठ्ठा होगे अउ जमके लाठी डंडा चलिस. हमला म काफी संख्या म ग्रामीण लहूलुहान होय हे.
सबो घायल मन के जिला चिकित्सालय म इलाज चलत हे. लवन चौकी प्रभारी एसआई पुरूषोत्तम कुर्रे के कहना हे कि दो पक्ष मन के मारपीट म 22 लोग मन घायल हे. बलवा के मामला दर्ज होय हे, लेकिन अभी कोनो के भी गिरफ्तारी नई होय हे. फिलहाल पूरा मामला के जांच करे जावत हे.
