रायपुर, 14 अक्टूबर 2020। मुख्यमंत्री श्री भूपेश बघेल ह आज गृह विभाग के बैठक के पहिली एक बड़ी कार्रवाई करत महिला संबंधी अपराध मन के विवेचना म लापरवाही बरते म वाड्रफनगर के एसडीओपी श्री ध्रुवेश जायसवाल अऊ थाना प्रभारी रघुनाथनगर श्री जान प्रदीप लकड़ा ल तुरंत प्रभाव ले निलंबित कर देहे हे। मुख्यमंत्री के निर्देश के तुरंत बाद पुलिस महानिदेशक श्री डी.एम. अवस्थी ह ए संबंध म आदेश घलोक जारी कर दीस। निलंबन अवधि म इंकर मुख्यालय पुलिस महानिरीक्षक कार्यालय सरगुजा रखे गए हे।
जानबा हे के मुख्यमंत्री श्री भूपेश बघेल ह महिला मन के विरूद्ध अपराध के रोकथाम बर प्राथमिकता अऊ पूरा गंभीरता ले काम करे के निर्देश पहिलिच देहे रहिन। मुख्यमंत्री ह पाछू बेरा म छत्तीसगढ़ उच्च न्यायालय के मुख्य न्यायाधीश ल घलोक पत्र लिखके यौन अपराध ले संबंधित प्रकरण मन के शीघ्र सुनवाई बर सबो जिला मन म जरूरी संख्या म फास्ट ट्रैक कोर्ट अधिसूचित करे के अनुरोध करे हें। उमन एखर बर राज्य शासन कोति ले सबो जरूरी सहयोग देहे के सहमति घलोक देहे हें।
