होम आइसोलेशन वाले कोरोना संक्रमित मन ल तुरते मेडिसिन किट देहे जाए : स्वास्थ्य विभाग ह होम आइसोलेशन संबंधी नवा निर्देश जारी करीन

रायपुर 26 मार्च 2021 शुकवार । कोरोना संक्रमण बाढ़े ले स्वास्थ्य विभाग कोति ले होम आइसोलेशन संबंधी नवा निर्देश जारी करे गे हवय । जम्मो जिला मन के होम आइसोलेशन के नोडल अधिकारी मन ल नाहके दिवस वीडियो कान्फे्रन्सिंग के माध्यम ले निर्देश देहे गे हे कि संक्रमित मन ल होम आइसोलेशन बर अनुमति तभे देहे जाए जब प्रभारी ये आश्वस्त हो जावयं कि मरीज घरेच म रहीके कोविड प्रोटोकाल,आइसोलेशन के नियम मन के पालन करही। अनुमति देहे के पीछू मरीज के घर तुरते दवई पहुंचाना चाही। 60 बछर ले अधिक उमर के अउ आने गंभीर बीमारी वाले मनखे ल ये अनुमति नही देहे जाना चाही । मरीज या उन्कर देखभाल करइया मनखे कहूं आक्सीजन स्तर के जांच ,तापमान आदि ले पाए म सक्षम नइ होही त उन् मन ल अस्पतालेच म भर्ती कराना चाही। दूर-दराज के इलाका मन म​ जिहां तीर म स्वास्थ्य सुविधा नइ होही उन मन तको अस्पतालेच म भर्ती कराए के सलाह देना चाही।
मरीज मन ल होम आइसोलेशन कंट्रोल रूम के फोन नंबर , चिकित्सक मन के नंबर देना चाही। कहूं मरीज फोन ले नइ बात करत हे तब उन्कर घर जाके उन्कर स्थिति पता करे के दायित्व तको नोडल अधिकारी के होथे।
होम आइसोलेशन वाले मरीज मन ल ये बजूर बताना चाही कि खतरा के चिन्हा कोन-कोन से हावय जैसे आक्सीजन के स्तर 95 ले कम होवय या लगातार बुखार हो आदि। वो स्थिति म तुरते अस्पताल रिफर करना चाही।
सामान्यतः कुल मरीज मन म ले लगभग 70 प्रतिशत मरीज होम आइसोलेशन म रहीथे तेकर पाय के एकर सही प्रबंधन अबबड़े महत्वपूर्ण हे अउ ये ह मृत्यु दर ल कम करे म तको सहायक होथे।