प्रदेशवासी मन ले सहयोग के अपील
रायपुर, 20 मार्च 2020। गृह मंत्री श्री ताम्रध्वज साहू ह आज अपन रायपुर निवास कार्यालय म पुलिस महानिदेशक श्री डी.एम. अवस्थी ले चर्चा करके नोवल कोरोना वायरस (कोविड-19) के रोकथाम बर जरूरी निर्देश दीन। उमन अफवाह अऊ भ्रामक खबर मन ले निपटे बर घलोक जरूरी कदम उठाए ल कहिन। गृह मंत्री ह कहिन कि कहूं कोनो पुलिसकर्मी म कोरोना वायरस के लक्षण परिलक्षित होही तो ओ ल तुरंत ईलाज बर सलाह देवव, ताकि आइसोलेशन सेंटर रेफर करे जा सकय।
गृह मंत्री श्री ताम्रध्वज साहू ह प्रदेशवासी मन ले जागरूक-सुरक्षित रहे के अपील करे हें। उमन अपन संदेश म कहे हें कि हम सब पूरा सतर्कता अऊ कर्तव्यनिष्ठा के संग डटके नोवल कोरोना वायरस ल मिलके हटावन। हम सब एक जिम्मेदार भारतीय नागरिक होए के नाते केन्द्र अउ प्रदेश सरकार कोति ले बचाव बर उठाए जात कदम मन के पालन म पूरा सहयोग करव। उमन प्रदेशवासी मन ले आग्रह करे हें कि धारा-144 के पालन करव, पुलिस प्रशासन के पूरा सहयोग करव, हाथ ल नियमित तौर म साबुन ले धोवव, अपन घर अऊ आसपास सफाई बरतव, भीड़-भाड़ वाले जगा मन म जाय ले बचव, जरूरी न होवय त घर ले बाहिर झन निकलव, सर्दी-खासी होए म तुरंते डॉक्टर ले सलाह लेवव।
