कोरोना संक्रमण ले बचाव बर वैक्सीन लगवाना जरूरी : गृह मंत्री
रायपुर, 10 मई 2021। गृह मंत्री श्री ताम्रध्वज साहू ह कोरोना महामारी संक्रमण ले सुरक्षा बर वेक्सिनेशन ल जरूरी बतात सबो पात्र मनखे मन ले टीका लगवाए के अपील करे हें। उमन कहिन हें के टीका ले ही बचाव संभव हे। गृहमंत्री श्री साहू ह काली अपन धर्मपत्नी श्रीमती कमला साहू के संग रायपुर मेडिकल कॉलेज पहुँचके कोरोना वैक्सीन के दूसर डोज लीन। उमन पहिली डोज 9 अपरेल के लेहे रहिन। उमन कहिन के वैक्सीन लगवाए ले ओ मन ल कोनो प्रकार के परेशानी नइ होए हे। मुख्यमंत्री श्री भूपेश बघेल ह कोरोना संक्रमण के रोकथाम बर जम्मो प्रबंध करे हे। मुख्यमंत्री ह प्रदेश के मनखे मन बर वैक्सीनेशन के सुविधा उपलब्ध कराए हें।
गृहमंत्री ह कहिन के टीका हर प्रकार ले सुरक्षित हे, एखर से डेरावयं झन, घबरावयं झन। उमन आम जनता ले अपील करे हें के मनखे मन अफवाह म झन आवयं अऊ वेक्सीन के दू डोज लगवावयं अऊ अपन अऊ परिवार के जीवन ल सुरक्षित करयं। उमन मनखे मन ले अपील करे हें के कोविड-19 संक्रमण के दिशा-निर्देश के सबो मनखे मन कड़ाई ले पालन करयं। लॉक डाउन म बिगर काम के बाहिर झन निकलयं, मास्क खच्चित पहिरयं, साबुन अऊ सैनिटाइजर ले हाथ धोत रहयं, भीड़ वाले जगा म फिजिकल डिस्टेंसिंग के पालन करयं। कुछ लक्षण दिखए त स्वास्थ्य विभाग ल सूचना देके अपन कोविड जांच जरूर करावयं। उमन कहिन के सबो के सहयोग ले ही हम कोरोना ल हरा पाबोन।
