गृह मंत्री ह कई ठन गांव मन के दौरा करके मनखे मन ल कोरोना बीमारी ले बचाव बर करिन जागरूक

रायपुर, 08 अप्रैल 2020। गृह मंत्री श्री ताम्रध्वज साहू ह आज दुर्ग ग्रामीण विधानसभा क्षेत्र के कई ठन गांव मन के सघन दौरा करके मनखे मन ल कोरोना बीमारी ले बचे बर जागरूक करिन। उमन उतई, पाउवारा, जजंगिरी, अंडा, विनायकपुर, आमटी, निकुम, खाड़ा, आंजोरा गांव के मनखे मन के बीच जाके ओ मन ल बताइन के कोरोना बीमारी पूरा विश्व म महामारी के रूप ले चुके हे। ये बीमारी ले बचे बर राज्य अऊ केन्द्र सरकार कोति ले बहुत अकन उपाए करे जात हे। श्री साहू ह मनखे मन ल कोरोना बीमारी ले सचेत करत कहिन के आप मन बाहरी मनखे ले मिले ले बचव अऊ जादा ले जादा बेरा अपन घर म ही रहव। उमन गांव के प्रमुख मन ले खुदे अऊ गांव वाले मन ल साफ-सफाई म विशेष ध्यान रखे, सरलग साबुन ले हाथ धोत रहे, एक-दूसर ले कम से कम एक मीटर के दूरी बनाके उठे-बइठे अऊ बात-चीत करे के सलाह दीन। श्री साहू ह गाव मन म बाहिर ले अवइया मनखे मन के संबंध म घलोक पूछ-ताछ करिन।