नवनिर्वाचित विधायक मन के सम्मान समारोह
गरीब मन ल घर देवाए कराए के वादा हमन करेन पूरा
गजमाला अउ पगड़ी पहिरा के स्वागत गीत ले करे गीस मुख्यमंत्री के पारंपरिक स्वागत
रायपुर, 18 दिसंबर 2023। मुख्यमंत्री श्री विष्णु देव साय आज राजधानी रायपुर स्थित पंडित दीनदयाल उपाध्याय ऑडिटोरियम म अनुसूचित जनजाति शासकीय सेवक विकास संघ कोति ले आयोजित आदिवासी समाज के नवनिर्वाचित विधायकों के सम्मान समारोह अउर आमसभा म सामिल होइन। मुख्यमंत्री श्री साय ह दीया बार के समारोह के शुरुआत करिन ये बेरा म सर्व आदिवासी समाज कोति ले मुख्यमंत्री के स्वागत गजमाला अउ पगड़ी पहिरा के पारंपरिक आदिवासी स्वागत गीत ले करे गीस।
ये बेरा म समारोह ल सम्बोधित करत श्री साय ह कहिन कि आज 18 दिसंबर के दिन हे। आप मन सबो ल बाबा गुरु घासीदास जयंती के हार्दिक बधाई। परमपूज्य बाबा गुरु घासीदास जी ह समाज ल मनखे मनखे एक समान के संदेश देके हम सब ल नवा रद्दा देखाय हे। आज हमार समाज बर सौभाग्य के बात हे कि जऊन छत्तीसगढ़ म करीब 32 प्रतिशत अनुसूचित जनजाति के आबादी हे अऊ जिहां सबके अपेक्षा रहिस कि आदिवासी मुख्यमंत्री बनय, हमार आदिवासी समाज के ये उम्मीद ल देश के यशस्वी प्रधानमंत्री श्री नरेन्द्र मोदी जी ह पूरा करे हे।
श्री साय ह कहिन कि आज हमार प्रधानमंत्री जी के सेती पूरा दुनिया म हमारे देश के डंका बाजत हे। आज देश के सर्वोच्च महामहिम राष्ट्रपति के पद म हमार आदिवासी समाज के श्रीमती द्रोपदी मुर्मू जी विराजमान हे। छत्तीसगढ़ राज्य के निर्माण हमार पूर्व प्रधानमंत्री श्रद्धेय अटल बिहारी वाजपेयी जी ह करिस, ताकि इहां के अनुसूचित जनजाति के मनखे मन के समुचित सामाजिक अउर आर्थिक विकास हो सकय। अनुसूचित जनजाति के सर्वांगीण विकास हो सकय ते पाए के उमन भारत सरकार म पहली पइत आदिम जाति कल्याण विभाग के गठन घलोक करिन। अनुसूचित जनजाति समुदाय के सबसे जादा चिंता हमरे सरकार करथे।
श्री साय ह कहिन कि सबका साथ, सबका विकास के संकल्प लेके मोदी के गारंटी म छत्तीसगढ़ के जनता ले जऊन घलोक वादा हमन करे हन, ओला पूरा करे के जवाबदारी हमर हे। हमर सरकार ह ही महतारी वंदन योजना के अंतर्गत हरेक साल माता-बहिनी मन ल 12 हजार रुपिया अऊ किसान मन के हित म 31 सौ रुपिया प्रति कुंटल धान खरीदी के घोषणा के संग हर एक वर्ग के हित म घोषणा करे हन। उमन कहिन कि हमन वादा करे रहेन कि गरीब मन ल घर देवाबो, हमन एला पूरा करे हन। हमन 13 दिसम्बर के शपथ ग्रहण करेन अऊ 14 दिसंबर के सबले पहिली केबिनेट म 18 लाख हितग्राही मन ल घर देहे के निर्णय लेन।
ये बेरा म उपमुख्यमंत्री श्री विजय शर्मा, विधायक श्री केदार कश्यप, विधायक श्री कवासी लखमा संग आदिवासी समुदाय के आन विधायक, अउर अनुसूचित जनजाति शासकीय सेवक विकास संघ के प्रांताध्यक्ष आर एन ध्रुव संग आदिवासी समुदाय के आन गणमान्य नागरिक उपस्थित रहिन।